November thlaah gas bûr 1,58,135 a thleng

Mizoram sorkarin truck a ruahman hmanga gas phurh luh a nih hnuah Mizorama gas phurh luh zat nasa takin a pung a, November 2016 chhung khan mipuia sem turin gas bûr 1,58,135 phurh thlen a ni.

Food, Civil Supplies & Consumer Affairs (FCSCA) department secretary Dr Franklin Laltinkhuma hnen aṭanga thu dawn danin, kumin November thla chhung khan Mizoramah eirawngbawlna gas bur 1,58,135 a lo thleng a; chungte chu Mualkhang Gas Bottling Plant
aṭanga lak bur 80,784 leh Borkhola, Assam aṭanga lak luh bûr 77,351 a ni.

Dr Franklin Laltin-khuma chuan zawhna chhangin, kumin June thla vel aṭanga Mizorama gas a harsat hma, transporter-te'n an phurh ṭhat lai chuan Mizoram tan thla khatah gas bur 1,20,000 hmuh ṭhin a nih thu a sawi a, "Tunah chuan thla khatah bur 1,50,000 chuang ka hmu a, a khah ṭhat tawh bawk avangin bûr pakhatin a daih rei tawh hle a ni," a ti.

October 19, 2016-a FCSCA hotute leh Indian Oil Corporation hotute Secretariat Conference Hall-a Mizorama gas harsatna sutkian dan tur an sawihonaah FCSCA Secretary chuan Mizoramin gas a mamawh belh thu thleni-n, gas pek belh turin a ngen a; IOC executive director Dipankar Roy chuan kumin November leh December thlaa bûr 1,50,000 ve ve an pek tur thu a lo sawi tawh a ni.

Supply Secretary sawi danin, tunah hian IOC-in a phalsak angin Mizoram sorkarin truck a ruahman 12 leh distributor-te'n truck an hman 12 hmangin Mualkhang Bottling Plant aṭangin gas phurh chhuah ṭhin a ni a; Mualkhang
aṭanga gas phur ṭha duh lo gas transporter-te chuan Borkhola aṭangin an phur mek bawk.

Transporter-te'n tender an chhannaah, Borkhola-a an phurhna rate a ṭha a, Mualkhang aṭanga an phurhna rate erawh a ṭha lo niin Supply Secretary chuan a sawi.

Sorkar ruahman truck-te chuan Mualkhang aṭanga gas an phurhna man atan IOC aṭangin km. khatah Rs 39.78 an hmu a, Mizoram sorkarin km. khatah Rs. 9.18 an pek belh bawk. Distributor-te truck ho chuan IOC aṭangin km. khatah Rs. 42.84 an dawng a, Mizoram sorkarin a pek belh ve lo thung.