AMC-in in sak phalna 6,687 an pe tawh Kuminah property tax nuai 1680 an hmu tawh

Aizawl Municipal Cor-poration (AMC) chuan kum ruk chhungin Building Regulations hnuaiah in sak phalna 6,687 an pe tawh a; sorkar kum kal mek, 2016-17 chhungin property tax aṭangin Rs. 16,80,71,051 an hmu tawh.

AMC Building Regulation leh property tax chungchangah AMC commissioner Dr H Lal-thlangliana chuan nimin khan Aizawl Press Club-ah thuthar thehdarhtute a kâwm a; Building Regulation chu AMC din hma, Aizawl Development Authority (ADA) hun laiin siam a ni a, AMC din hnuah AMC-in a keng chho zui tih a sawi.

AMC Commissioner chuan, ADA hun lai, kum thum leh a chanve chhungin Building Regulations hnuaiah Aizawlah in sak phalna 3,341 pek a ni a, AMC-in 6,687 a pe leh tawh a, ADA hun lai leh AMC huna in sak phalna pek zat chu 10,028 a ni tawh tih a sawi a, "AMC chhunga in sa tur reng rengin AMC-ah phalna an lak a ngai a, in ṭhiat tur pawhin phalna lak a ngai. In sak tih hian, chenna in bakah, garage leh bawng-in ang chite pawh a huam vek a ni," a ti.

Dan loa in sate chu siam-ṭhattir emaw, ṭhiahtir emaw a ni ṭhin tih sawiin, Dr H Lalthlangliana chuan, "Anmahni kan tihtir mai a, an ṭhiah hnuah kan endik leh ṭhin. Mualpho taka ṭhiahsak luih ai chuan a ṭha zawkin kan hria," a ti a; phalna nei loa in sak leh phalsak ang loa in sate chu ṭhiahsak luih ngaiin awm lo se an duh ber thu a sawi.

AMC Commissioner sawi danin, October 17, 2016 aṭangin Aizawl khawpui chhung hmun kilkhawr zawka inte an enfiah a, dan loa in sak 283 an hmu chhuak. In 293 zinga 61 chu pass mumal nei loa sak a ni a, in 41 chu sorkar building a ni. Zawhna chhangin, Commissioner chuan, "In kan enfiahte hi Building regulations hman hnu, kum 2008 hnu lama sakte a ni," a ti.

Commissioner chuan, in sak titawp tura thuperk chhuah tawh, la sa lui an awm leh awm loh an en zui zel dawn tih a sawi a; dan loa in sa zui luite chu hrem an nih tur thu a sawi bawk.

Property tax chungchangah Dr H Lalthlangliana chuan, kum 2016-17 atan June 16, 2016-ah khawn ṭan a nih thu sawiin, "property tih hian in leh ram ruak a huam a, tunah hian building-ah chauh khawn a ni a, in ruakah khawn a ni rih lo," a ti a; property tax chu local council-in an veng ṭheuhah an khawn thu sawiin, "LC-ah leh AMC office-ah pek theih a ni a, March 31, 2017 thleng a pek theih," a ti.

AMC Commissioner sawi danin, property taxa-h hian sorkar kum kal mekah Rs. 16,80,71,051 hmuh a ni tawh a; Aizawla LC 83 zinga 73-in AMC-ah an thehlut tawh a, chutih rualin, an la khawn kim vek lo. LC-in an khawnte chu an sum hmuh zat aṭanga 5% chu LC-in an chang dawn a ni. Kum 2015-16 chhung khan Rs. 1,14,55,450 hmuh a ni thung. Property tax aṭanga sum lut zinga 80% chu mipui tan hman tur a ni a, 20% chu AMC mamawh atan hman tura tih a ni.

Commissioner chuan, property tax lakna atana in an tehnaah a hmunah kal chilh vek ni mah se, tihsual palh a awm nual thu sawiin, "Tihsual palhte chinfel zel a ni a, complaint duh tan complaint theih a ni a, complaint dawn kan inpeih reng a ni," a ti a; tihsual palh chinfel turin AMC pisaah Special Cell an siam tih a sawi.

Dr H Lalthlangliana chuan, Aizawl mipuite'n property tax pek an hreh lo a, an pe ṭha hle tih sawiin, lawmawm an tih thu a sawi a; Building Regulations anga hma an laknaah pawh mipuiin thu an awih a, dan zawm duh lo lui tlat an awm loh thu a sawi bawk.