MYC-in ram danga thawk duh a zawng

Mizoram Youth Commission (MYC) chair-man T Sangkunga, MLA chuan, UAE leh Bahrain ramah hna thawh tur eng emaw zat a awm thu leh, Saudi Arabia-ah nurse hna ṭhahnem tak a awm thu sawiin, Mizo
ṭhalaite chu thawh tum turin a sawm a; thawk duh turte chu tun aṭanga passport buaipui nghal turin a chah.

MYC Chairman hian nimin khan Aizawl Press Club-ah thuthar thehdarhtute kâwmin, UAE, Bahrain leh Saudi Arabia rama hna hrang hrang thawk tur lakna atan MYC kaltlangin December 6-7, 2016 chhungin Skype (online) hmangin interview neih a nih dawn thu a sawi a, "Passport neih a ngai a, passport nei lote pawhin neih vat tur a ni," a ti a; hre chiang duh tan MYC pisaah ngaihven theih a nih thu a sawi.

MYC Chairman sawi danin, UAE leh Bahrain ramah restaurant leh retail outlet-a thawk tur mipa leh hmeichhia lak tum a ni a; Saudi Arabia-ah nurse hna thawk tur eng emaw maw zat an duh bawk. Hlawh chu Rs. 20,000 - 50,000 a ni a, kum 20 aia naupang lo tan dil theih a ni.

T Sangkunga chuan, Genting Dream Cruise-ah light & sound techni-cian pakhat, stage hands pahnih, photo manager pali, cook panga, bartender, assistant bartender, cellar master leh bar manager-te mamawh a nih thu a sawi leh, a duh tan MYC pisaah ngaihven theih a nih thu a sawi. Ram danga hna thawk tur an buaipuinaah hian Joncia Marine, Margao, Goa-te an thawhpui tih a sawi a ni.

MYC Chairman chuan, SSC coaching class an kalpui hnuah, SSC preliminary exam hnuhnung berah an hnena training mi 55 chu an tling ve tih a sawi a; SSC coaching batch thar tur interview an neihpui mek a, December 9-ah an ṭan leh dawn tih a sawi bawk.