Sazaikawn Urban Primary Health Centre hawng

Health minister Lal Thanzara chuan nimin khan Lunglei Sazaikawna Urban Primary Health Centre building thar a hawng. In hi cheng nuai 75 sênga sak a ni.

Lal Thanzara chuan, ram mipuite an hrisel theih nana Chief Minister-in theihtawp a chhuahpuina a zarah hmasawnna tam tak hmuh a nih thu a sawi a; sorkar laipui ruahman angin, thingtlang mite an hrisel zawk theih nan hmun hrang hrangah UPHC din a nih thu sawiin, damdawi-ina thawkte chu missionary rilru pûa thawk turin a chah.

Health Minister chuan, Lunglei district-a sorkar damdawi-in hrang hrangte chu thuam ṭhat zel a nih tur thu leh mipuite chu nuar kher loa sorkar hmalakna ṭawiawm thin turin a sáwm a; Lunglei Civil Hospital-ah CT Scan dah turin ruahmanna kalpui mek a nih thu leh tender chhuah tawh a nih thu te, Lunglei Civil Hospital-a doctor indaih lohna sorkarina hriat thu leh NHM hnuaiah doctor dah tum a nih thute a sawi bawk.

Lunglei West bialtu MLA Chalro-sanga Ralte pawhin thu sawiin, a bial chhung Sazaikawna UPHC hawn a ni chu bial aiawhin lawmthu a sawi a; mipuite chu sorkar do zawng ni lo, sorkar thâ tichaka ṭawiawm ṭha turin a sáwm.

Sazaikawn UPHC hi cheng nuai 75 sênga sak niin, Lalhnema, Khatla-in a sak a ni a; June 19, 2015-ah sak ṭan niin, October 13, 2016-ah sak zawh a ni.