Mizoram sorkarah MR 13,256 an awm 'Thlarau MR' mi 3,000-5,000 vel nuai bo

Mizoram sorkar hnuaia 'Thlarau MR' an tih mai, muster roll-a thawk, mihring awm si lote tihbona tura sorkarin hma a lakna kal zelah, Thlarau MR mi 3,000
aṭanga 5,000 vel nuaibo anga ngaih a ni a; tun dinhmunah MR mi 13,256 an awm. Finance minister Lalsawta chuan thlarau MR tihbo a nih avangin sorkarin kum khatah cheng vbc. 58 vel an a hum theih phah niin a lo sawi tawh a ni.

MR-te hi chi li - skilled grade-I, skilled grade-II, semi skilled leh unskilled-ahte ṭhen an ni a; sorkar department-te'n an MR-te an Electoral Photo Identity Card (EPIC) nena Finance-a an thehluh aṭanga a lan danin, Mizoram sorkarah Plan hnuaiah leh Non-Plan hnuaiah MR 13,256 an awm.

Hetih lai hian, kumin kum tira Plan hnuaia EPIC paltlang tawh MR dinhmun leh tun hnaia EPIC paltlang tho MR dinhmun erawh inang lo a awm nual thung.

Vanglaini-in RTI Act hmanga a zawhna chhàn a nih danin, Finance department-in MR an enkawl, Non-Plan hnuaia hlawh late chu mi 4,408 an ni a; hei hi sorkar department 35-in MR an neih zat an EPIC-te nen Finance department-a an thehlut zat a ni.

Non-Plan hnuaiah PHE department-in MR nei tam berin, mi 2,589 an nei a; GAD-in dawtin, MR 197 an nei. MR 100 aia tam neite chu - Finance department-in mi 100, Home department-in mi 143, FCSCA department-in mi 141, PWD-in mi 196, UDPA-in mi 176 leh Law and Judicial department-in mi 124-te an ni.

Plan hnuaia hlawh la, Planning & Programme Implementation department (Research & Development Branch)-a sorkar department 41-in an MR neihte hming, an EPIC nena an thehluh tawh zat chu mi 8,848 an ni. Plan hnuaia hlawh la MR nei tam ber chu PHE department niin, MR mi 3,044 an nei a; a dawttu Power & Electricty department-in mi 2,783 an nei. PWD-in MR mi 1,068 an nei a, department dang zawng chu MR mi 100 aia tlem nei an ni hlawm.

PHE department chu Plan leh Non-Plan hnuaia MR nei tam ber a ni ve ve a, Plan leh Non-Plan hnuaia MR an neih belhkhawm chu mi 5,633 an ni.

Plan leh Non-Plan hnuaia MR zat belhkhawma MR za chuang nei department-te chu - Animal Husbandry & Veterinary mi 241, Environment & Forest mi 167, Sericulture mi 174, Tourism mi 157, Health department mi 165, UDPA mi 149 an ni. Department dang zawng chu MR mi 100 nei tling lo an ni.

MR-te zinga hlawh tam ber, skilled grade-I ten ni khatah Rs. 460 hlawhin, kum khata an hlawh zat chu Rs. 1,65,600 an hlawh. Skilled grade-II MR pakhatin ni khatah Rs. 370 a hlawh a, kum khatah Rs. 1,33,200 an hlawh. Semi skilled-te'n ni khatah Rs. 300 hlawhin, kum khatah Rs. 1,08,000 an hlawh a, Unskilled MR-in ni khatah Rs. 270 hlawhin, kum khatah Rs. 97,200 an hlawh.

MR-te hlawh lakna tura an tehfung ṭhen hranah casual MR/employee-ah semi skilled-in Rs. 300 an hlawh laiin, Roads and Building Operations leh Employment in registered factories not elsewhere classified tihah chuan semi skilled-te hian Rs. 290 an hlawh a ni.

Vanglaini-in RTI Act hmanga Plan hnuai bika MR dinhmun, EPIC thehlutte December 12, 2015-ah a lo dil chhuak tawh a; chumi chhanna leh November 3, 2016-a SPIO pangngai thoin zawhna a chhanna nena khaikhinin, department-te chuan kuminah MR an nei tam zawk vek a ni.

Power & Electricity department-in mi 511-in an nei tam a, School Education department-ah mi pasarihin, Health department-ah mi pahnihin, PHE department-ah mi 482-in, PWD-ah mi 450-in an tam zawk bawk.

EPIC thehluh hnua RTI Act hmanga zawhna chhannaa MR dik takte dinhmun inang lo chungchangah hian Planning department hotute chuan, sorkar department-te'n EPIC hmanga MR dinhmun dik nia an ngaih an thehluh hnuah tihsual an nei ang a, a dik tak zawk an thehlut nawn leh nia an rin thu Vanglaini an hrilh.

Hetih lai hian, Finance department-in Non Plan hnuaia MR dinhmun a tarlana belhkhawmah chuan mi 4,411 a ni a, department-te MR dinhmun chu chhût ṭhat a nih hnuah mi 4,408 (mi pathumin an tlem) an ni. Hei hi department-te MR zat leh serial no. 3 nen dah zawm a nih avangin serial no. 3 chu belh tel palh nia ngaih a ni.

Finance department-in an enkawl, Non-Plan hnuaia hlawh la MR-te chu budget-a Wages head hranpa an dah ṭan kum chu kum 1974-75 financial year a nih thua chhan a ni a; Plan hnuaia hlawh la MR-te hlawh tur chu kum 2015-16 budget-ah Wages head hranpaa dah tuma hmalak a ni thung.

Finance department-a SPIO-in RTI Act zawhna a chhan danin, sorkar kum kal lai 2016-17 budget estimate-ah MR hlawh (wages) atan Non-Plan-ah cheng nuai 4,072.55 leh Plan-ah cheng nuai 4,365.18, a vaiin nuai 8,435.73 dah a nih thu a tarlang. 'Works department (PHE, PWD, P&E)-ah hian casual labour/worker-te hlawh chu Minor Works aṭanga pek a ni a, anni ho hlawh hi chu wages head-ah dah a ni lo,' a ti.

Vanglaini zawhna, Planning department SPIO-in December 7, 2015- a a chhannaah chuan, 'MR-te hlawh wages head-a dah vek turin tun kum budget-ah sorkar department-te Sectoral Allocation of Plan Outlay-ah a hranpain dah (earmark) a ni. P&E leh PHE department-te erawh chuan wages head an la nei lo a, an neih theih nan hmalak mek a ni' tiin a lo chhang tawh thung.