Krismas thilpek atan thisen pe turin sáwm

Association for Voluntary Blood Donation (AVBD) chuan thuchhuah siam-in, Aizawl Civil Hospi-tal (ACH) nen ṭang dunin ACH Blood Bank-ah 'Christmas Blood Donation' camp an huaihawt dawn tih an tarlang a; Krismas thilpek atan thisen pe turin Mizo
ṭhalaite an sáwm.

Krismas leh kumthar vuakvêtah thisen mamawh-na a sang ṭhin a, chutih laiin, thisen pek a tlakhniam hun lai a ni tih tarlangin, AVBD chuan, "December thla chhung hian Krismas thilpek atana thisen pek uar tur leh thisen pek tum ṭheuh turin Mizo ṭhalai te, mahni chauh emaw, ṭhian ho emawa Mizorama blood bank hrang hrangah kala thisen pe turin kan sáwm a ni," an ti.

AVBD tarlan danin, blood bank zinga thisen mamawh sanna ber leh mipuiin kan pan nasat ber, ACH Blood Bank nen ṭang dunin vawiin aṭangin ACH Blood Bank-ah 'Christmas Blood Donation' an huaihawt dawn a; thisen petute hnenah ei leh in tur (refreshment) tuihnai tak an pe zel dawn a ni.

AVBD chuan, kum 2016 chhunga Mizoram district pariata blood bank 10-a thisen petute zawng zawng chungah lawmthu an sawi a, "Pawl hminga thisen pe leh mimala pete zawng zawng kan chhuang tak zet a, an chungah lawmthu kan sawi. Mizo ṭhalaite thisen pekte hi nunna chán mai turte'n dam phah nan an hmang a; thisen petute hi damlote nunna chhanhimtu an ni," an ti.