KHAWTHLIR

Hulhliap training

Hulhliap Short Stay Centre aṭanga chhuak tawhte a thlawna thiamthil inzirtirna, After Care Skill Development Training batch 3-na chu nimin khan Dawrpui Vengthara Mission Foundation Movement Skill Training Centre-ah ṭan a ni a, Hulhliap Core Committee chairman Malsawmzuala Ralte-in a hawng. Malsawmzuala Ralte chuan, training turte chu a tawp thlenga zir ngei tur te, kohhran bèl tlat tur leh Pathian ráwn chung zela hma lam hun thlir turin a chah. Hulhliap SSC training-ah hian thawh 1-na leh 2-naah mi 78 an inzir chhuak tawh a, batch 3-naah hian mi 16-in assistant electrician an zir dawn a ni.

MJA nen inkâwm

State information commissioner Mangjangam Touthang chuan nimin zing khan Lawngtlai Press Club-ah MJA, Lawngtlai District member-te a kâwm. Mangjangam Touthang chuan, sorkar laipui leh state sorkarin mipuite tana hamṭhatna a duante puanzar kawngah MJA-te'n mawhphurhna sang tak an nei tih sawiin, theihtawp chhuaha thawk turin a fuih a; chanchinbumite chu sorkar leh mipui inkara palai hna thawktu an ni tih inhre reng turin a chah bawk.

Thupha chawi

Chanmari West Local Council, YMA, MUP leh MHIP te chuan thuchhuah inṭâwm siamin, an veng tlangval H Lalruatmawia s/o Lalrinmawia Hauhnar kut tuara Richard Lalhmingliana, North Vanlaiphai a thih avangin thuphá an chawi tih an tarlang. Vanduaina thleng chu pawi an tih thu leh an dem thu te, Richard-a chhungte an tawrhpui thute an tarlang bawk.

Naupang himna zirho

School Education department-a thawkte pualin nimin khan ATI Auditorium-ah naupang himna leh dikna chanvo chungchang zirhona buatsaih a ni a; School Education secretary David Lalthantluanga chuan, zirna-inah naupangte dikna leh himna kenkawh ngei a ṭul thu a sawi. Civil judge F Laltlansangi leh mi dang paliin naupangte dikna leh himna chanvo chi hrang hrang an zirtir a ni.