Reading Decathlon-a che ṭhate lawmpui

Mizoram Youth Commission (MYC) chuan nimin khan India ram puma lehkhabu chhiar aṭanga quiz inelna, Reading Decathlon-a pahnihna Mount Carmel School, Chaltlang leh pathumna La Montessori School, Mission Veng zirlaite lawmpuina hun an buatsaih.

Reading Decathlon hi Food4-Thought Organisation leh Monocept buatsaih a ni a, Mizoram aṭanga telte hi MYC kaltlanga tel an ni. Ram pum huap inelnaah Mt Carmel School pawl 9 zirlai Krista Roluahpuia Khiangte leh pawl 8 zirlai Rebek Malsawmzuali te pahnihna an ni a; La Montessori School-a pawl zirlai zirlai pahnih Malsawmhlui Pachuau leh Joshua Lalawmpuia te pahnihna an ni.

Malsawmzuala Ralte chuan, Reading Decathlon 2025-a hlawhtling zirlai palite chu a lawmpui thu sawiin, an zirtirtu te, nu leh pa te, MYC officer leh thawktute thawhrimna leh inpekna fakawm a tih thu a sawi a, "Kan nauten hlawhtlinna hi lehkhabu chhiar tam kan inzirtirnaa a ṭha zawnga mi dangte tihhmuhtu a nih ngei ka beisei. Eizawnna kawnga hlawhtlin a pawimawh em em a, chutihrualin, hlawhtlin kan duh luat avanga vanram kawng kan bo a hlauhawm, dik lo taka hlawhtlin aiin vanram kawng kan thlang zawk tur a ni," a ti.

Lawmpuina inkhawmah hian MYC secretary Lalmuanpuii'n Reading Decathlon-a Mizoram aiawhte tel dan a sawi a; zirlai nu leh pate leh an zirtirtute'n thu an sawi bakah, thuthar thehdarhtute leh zirlai hlawhtlinna changte an inkâwm nghal a ni.