MIFCO-in Sialhawk lakhuihthei lei vek a tum

Mizoram Food & Allied Industries Corporation Ltd. (MIFCO) chairman Lalṭhazuala Rawite chuan, Sialhawk leh a chhehvela lakhuihthei tharte MIFCO-in kg-ah Rs 18-20 velin leisak vek an tum thu a sawi.

MIFCO Chairman hian nimin khan Sialhawk khuaa lakhuihthei chingtute a kâwm a, lakhuihthei chìnna hmunte a tlawh. Sialhawk leh a chhehvela lakhuihthei tharte MIFCO-in leisak vek an tum thu sawiin, "Lakhuihthei hi kg khat cheng 18-20 vela lei turin kan inruahman a, Sialhawk leh a chhehvela lakhuihthei chingtute harsatna sutkian kan tum a ni," a ti.

MIFCO-ah leiba eng emaw zat a awm ṭhin thu sawiin Lalṭhazuala Rawite chuan, "2025 October kan thlen chuan kan leiba kan rûl zo a, hlawkna cheng nuai 14 kan nei hman," a ti a; MIFCO-in lakhuihthei bakah, sapthei leh mipui ei tur sa thianghlim lam te, chini leh buhfai thlenga an buaipui tawh thu a sawi.

Sialhawk Pineapple Grower Society chairman J Rampanmawia chuan, kum 2025-ah Sialhawk khuain lakhuihthei quintal 12,000 an thar a, chu chu Mizoram puma lakhuihthei thar aṭangin 64% vel nia an ngaih thu a sawi a, "Kan thar tam ber kum 2022 khan qtl 14,000 kan thar a, kumin hian qtl 12,000 vel thar leh kan inbeisei," a ti.

J Rampanmawia chuan, lakhuihthei an tharte chu a hmunah kg-ah Rs 10-in sumdawngte'n an lei ṭhin thu te, Aizawl, Champhai leh Mizoram hmun dangah an hralh ber thu te, state pâwn aṭangin dawrtu awm ve ṭhin mah se, an hlâwkpui loh thu te, an innghahna ber chu MIFCO a nih reng thu te, an thar vanglai chuan chawhrualin ni tin pick-up phur 20 an thawn chhuah a ngaih ṭhin thute a sawi bawk.