Max Hospital doctor-te nen hun hmangho

Mizoram State Health Care Society (MSHCS) chuan nimin khan Hotel Lalawi-ah Mizorama doctor-te tan Continuing Medical Education (CME) an buatsaih a ni a; MSHCS chief executive officer Dr Lalhriatzuali Ralte-in a hmanpui.

Zirhonaah hian Aizawl Civil Hospital, Zoram Medical College and Hospital leh Mizoram State Cancer Institute-a doctor-te an tel a; Max Hospitals, Delbhi-a superspecialist doctor-te'n cancer enkawl, thin thlak, thlîng thlak, thluak zai, lung (heart) natna enkawl, zunkawng ṭha lo enkawl chungchangte an zirtir a, sawihona hun hman a ni.

Dr Lalhriatzuali Ralte chuan, Max Hospital, Delhi aṭanga superspecialist doctor-te'n hun an rawn hmanpui thei chu a lawm thu a sawi.

MSHCS CEO sawi danin, Mizoram Universal Health Care Scheme hnuaiah damlo mi 68,022 inenkawlna atan Rs 1,15,29,58,153 (vbc 115.29) pek chhuah a ni tawh. MUHCS hi Mizorama sorkar damdawi-in zawng zawng bakah, kohhran/mimal damdawi-in 16 leh day care centre pathum ten an zawm tawh a, Mizoram páwna mimal damdawi-in 33-in an zawm tawh bawk.