CM-in Sericulture project IMSDP a hawng

Sericulture department-in North East Region Tex­tiles Promotion Scheme (NERTPS) hmanga hma an lak tharna tur, Integrated Muga Silk Development Project (IMSDP) chu December 2, 2016 zan khan chief minister Lal Thanzara'n Ṭhuampui helipad-ah a hawng.

CM Lal Thanhawla chuan, Muga silk ṭhatna hmun leh a hmunpui berah ngaih Assam chu sik leh sa inthlak danglamin a tihbuai nasat avangin an Muga siam chhuah zat chu nasa takin a tlahniam niin a sawi a, "Silk lama mithiamte'n zir chiangin, kum 2012 leh 2013 khan Nagaland leh Mizoramah Muga enchhin nan hmalakna an nei a, tlang ramah nipui laiin Muga pangangte'n cocoon an siam ṭha thei bik tih hmuhchhuah a nih avangin sorkar laipuii chuan NERTPS kaltlangin Sericulture atana zau zawka hmalak a rel ta a ni," a ti.

NERTPS chu Sericulture hmanga eizawngtute tan mal­sawm­na a nih theih thu leh NLUP-ah pawh Sericulture ngaih pawi­mawh a nih thu sawiin, Chief Minister chuan, "Sericulture leh hemi hmanga eizawngtute ham-ṭhatna turin sorkarin theihtawp a chhuah zel dawn a, NERTPS hnuaia remchannate hi kan hman ṭangkai a, sum leh pai lak luh nan kan hman thiam a pawimawh dawn a ni," a ti a; Sericulture hnuaia kut hnathawktute chu nasa lehzuala ṭan la turin a chah.

Sericulture minister Dr BD Chakma pawhin thu sawiin, NERTPS kaltlanga project pahnih hnuaia hmalak tawhnate a sawi a; project thara hmalak tum dan leh a huam turte a tarlang.

IMSDP hawnnaah hian Gover­nor Lt.Gen. Nirbhay Sharma leh minister dangte pawh an tel a ni.

IMSDP hawn zawhah Silk Couture (fashion show) neih a ni a, Mizo designer pathum - Lucy Sailo (Lucy’s Catalogue), Charlie Mathlena (Heritage Mizoram) leh Lalṭanpuii (Zozia Silk, Tlangnuam)-te silk puan hmanga thawmhnaw siamte model-te'n an pho lang a ni.

Sericulture department hian NERTPS hnuaiah pro­ject pahnih - Integrated Seri­culture Development Project (ISDP-NERTPS) leh Intensive Bivoltine Sericulture Development Project (IBSDP-NERTPS) an kalpui mek a; project thar Integrated Muga Silk Development Project (IMSDP-NERTPS) hi an kalpui leh dawn a ni.

IMSDP atan hian cheng nuai 1352.09 ruahman a ni a, beneficiary mi 500 tuam tum a ni. ISDP-NERTPS hnuaiah cheng nuai 3249.20 awmin, beneficiary 600 an awm a; IBSDP-NERTPS atan cheng nuai 3014.16 awmin, beneficiary 1,000 an awm bawk. Hetih lai hian, Sericulture department-ah hian NLUP leh hmalakna dangah beneficiery 2,954 an awm.