KHAWTHLIR
Thisen pe
Inrinni khan Armed Veng Bial KṬP chuan Aizawl Civil Hospital tan thisen unit 60 an pe a, a petute mipa 56 leh hmeichhia pali an ni. Electric Veng Bial KTP-in Aizawl Venglai Kohhran Hall-ah Synod Hospital tan thisen unit 36 an pe a, a petute mipa 31 leh hmeichhia panga an ni. Lunglawn Bial ṬKP leh HDFC Bank
ṭang dunin Lunglei Civil Hospital tan unit 40 an pe bawk a, a petute mipa 26 leh hmeichhia 14 an ni.
Rualbanlote Ni
December 3, Inrinni kha International Day for Persons with Disability a ni a, Zoram Entu Pawl (ZEP) leh Ferrando Integrated Women Development Centre – Peace Home huaihawtin Ralbanlote Ni hi Falkawn Cultural Centre-ah hman a ni. Bialtu MLA leh parliamentary secretary KS Thanga'n a hmanpui a; chawhnuah rualbanlote pualin sports & games hmanga intihhlimna hun hman a nih bakah, chawhlui kîlho a ni.
Sangha khawi zir
Directorate of Cold Water Fisheries Research, Uttarakhand leh Fisheries department chuan, Inrinni khan Fisheries directorate conference hall-ah 'Hill fish farming for the upliftment of rural economy in North Eastern Himalayan Region' tih buatsaih a ni a, Fisheries minister Dr BD Chakma-in a hawng. Training hian December 9, 2016 thleng a awh ang.
In saksak
October 28, 2016 zana leiminin a tihchhiat K Lalramsanga, Tualcheng in chu Inrinni khan khawtlangin an sak ṭhatsak. In sakna atana mamawhte chu khawtlang mipuiin an thawhkhawm a ni.
UPC khawmpui
UPC (North East India)-a Aizawl East District hnuaia Sunday School department-te chuan December 2-4 chhung khan Ṭhuampui UPC biak-inah inkhawmpui lian vawi 23-na an hmang a, thupui chu 'Naupangte tan Thlarau Thianghlim' tih a ni.
Gas bûr man
Central YMA Kumpuan duty-te chuan Inrinni khan Sihphir Arpu Vengah dan loa hralh tur gas bûr 46 leh a neitu nia sawi, Zoremsiama, Sihphir Arpu Veng an man. Gas an mante hi Zoremsiama'n pick-up MZ-01 K-4471 hmanga vai truck gas phur hnen aṭanga a lak chhawn a ni. CYMA Kumpuan duty-te hian Zoremsiama nupui, Vanlalruati hnen aṭangin dan loa hralh tur gas bûr 34 an lo man tawh bawk.