Assam PWD kawng laih chungchang Home Minister Lalzirliana'n a sawifiah

Home minister R Lalzirliana chuan, Assam PWD-te'n Mamit district-a Kanhmun dái, Medeli lui bul Mizoram chhungah kawngpui an lai nia sawi leh Kadaicherra-Damcherra-Zamuang-Kawrthah-Tuilutkawn kawng (KDZKT Road) an lai chat nia sawi chungchang Mizoram sorkarin thil awm dan dik tak hriat a tum mek niin a sawi.

Thuthar thehdarhtute zawhna chhangin R Lalzirliana chuan, Mizoram chhunga Assam sorkar thil tih chu Home department bawhzui tur nge, PWD bawhzui tur tih hriat fiah a la nih loh thu a sawi.

Home Minister chuan, a hmaa thil awm dan aṭanga ngaihruatnaah chuan, KDZKT Road siam tura hna inpek danah Mizoram PWD leh Assam PWD-te'n an ramri chin nia an hriata contract hna an inpek danah, thil inbawhthuah a awm avangin state pahnih PWD-te inkarah thil chinfel tur a awma a lan thu a sawi a; thuthang aṭanga thil hriat danah chuan, Assam PWD-in kawng an laih chah chhan chu tuihâwk luankawr atana hume pipe phûmna tur nia an sawi thu a sawi bawk.

Kanhmun Branch YMA president Zonunthanga chuan, Assam PWD-in kawng an laih chahna chu Medeli lui aṭanga hnai tê a nih thu leh, kawng laih chah a nih avangin Mizoram lama KDZKT Road siamtu ABCI motor lian, ke 10 nei chin chung lam an tlan thei tawh lo niin a sawi a; kawng laih chah khuar lai chu leia hnawh a ni a, truck pangngai leh motor tête chu Inrinni khan an tlan tho tih a sawi a ni.

Hetih lai hian, November 28, 2016-a Medili lui kam, Mizoram chhunga Assam PWD-te'n kawng an lai nia sawina hmun hi December 2 khan MNF party hruaitute chuan an tlawh a; Langkaih group YMA hruaitu te, Kanhmun V/C-te leh Zawlnuam MZP hruaitute'n an ṭawiawm.

MNF general secretary leh MLA Lalruatkima chuan, Congress sorkar inthlahdah vang-in Mizoram leh Assam ramrî-ah harsatna a awm fo nia sawiin, pawi an tih thu a sawi a, "Pi leh pute'n lu chhum bán chhum huama thî leh thau pawlha min lo humhalh-sak hi MNF chuan humhalha venhim tlat hi kan mawhphurhnaah kan ngai a, Assam lamin hma an rawn la zui a nih chuan kan ram humhalh turin kan thisen far tawp thlengin kan bei zel dawn a ni," a ti.

MNF thuchhuah chuan, Assam PWD-te'n Mizoram chhunga kawng zauh hna an thawk chuan Mizo mipui a barakhaih tak zet tih an tarlang a; Kanhmun V/C-te'n an hriat veleh Assam PWD-te an hnathawh titawp tura hma an la nghal chu fakawm an tih thu an tarlang bawk.

Medili tlawhtu MNF hruaitute hi Lalruat-kima bakah, an general secretary Lal-chhandama Ralte, secretary pathum Lalropuia Pachuau, Lalmuanthanga Fanai leh Lalrinsanga Ralte leh, MNF ṭhalai secretary HP Zonunsanga te an ni.