Faina kawnga thawk dun turin YMA leh NEIDA-in thuthlung an ziak

Swacch Bharat Mission (Gramin) hnuaia faina chungchangah mipui zirtir a, mipui rilru sûkthlêk thlakna tur hmalakna hrang hranga thawkho turin Central YMA leh TATA Trusts hnuaia North East Intitiative Development Agency (NEIDA)-te chuan December 2, 2016 tlai khan Chief Minister's Office conference hall-ah thuthlung an ziak.

Thawhhona thuthlung ziah inkhawm hmanpuitu chief minister Lal Thanhawla chuan, NEIDA-te'n CYMA thawhpuia faina chungchanga hmalakna tur thawhhona thuthlung an ziak chu lawmawm a tih thu sawiin "Tata Trusts-te'n Mizorama hmasawnna ngaihtuaha phal taka pawisa thawh a, Mizoram leh mipui tan thil ṭha leh ṭangkai an ti an fakawm," a ti a; Tata Trust-te inpekna tihhlawhtling turin an thawhpui department leh pawlte'n theihtawp an chhuah a ngaih thu a sawi.

Faina lamah Mizoram sorkarin Swacch Bharat Mission awm hma, kum 1980 chhoah Clean Aizawl leh Clean Mizoram hmangin bul a ṭan tawh tih sawiin Lal Thanhawla chuan, "Sorkar hmalakna avang hian state dangte aiin faina leh thianghlimna kawngah hma kan sawn a, Mizoram pum hi páwna dailéng awm lohna open defecation free-ah kan puang ṭêp tawh a ni," a ti.

NEIDA executive director Dharani Ratno chuan, kum nga chhungin NEIDA-in Mizoram tan kawng hrang hranga hmalakna atan cheng vbc. 18 a ruahman thu a sawi a, "Cheng vbc. 2 chu pek chhuah a ni tawh," a ti a; kawng hranga Mizoram sorkar an thawhpuinate a sawifiah.

CYMA president Lalbiakzuala pawhin thu sawiin, "Tata Trusts anga pawl hmingthangin CYMA an thawhpui hi lawmawm hle. Thawh dunna hlawhtlinna tur leh Mizoramah nasa zawka faina leh thianghlimna kawnga thawk turin CYMA chuan theihtawp chhuahin hma a la dawn a ni, "a ti.

Thawhhona thuthlung hnuaiah hian NEIDA-in CYMA hnenah cheng nuai 15 an pe dawn a, chu sum hmang chuan CYMA-in Clean Mizoram Campaign kaltlangin faina kawnga mipui zirtirna hrang hrang an buatsaih dawn. YMA branch, group leh sub-headquarters zinga hma la ṭha ber hnenah lawmman hlan a ni ang.