Hmun hrang hrangah Republic Day lawm a ni

Nimin khan Mizoram hmun hrang hrangah Republic Day lawm a ni a, district headquarters tinah leh civil sub-division leh block-ahte lawm a ni. District khawpuiah chuan DC-te khuallian an ni.

Lungleiah chuan Ṭhuamluaia Mualah Republic Day hman a ni a, DC V Lalsangliana'n hnam puanzar pawt pharhin parade contingent 17-te'n hnam puanzar chibai an bûk a chhang lêt.

V Lalsangliana chuan zalenna sual chhuaktu ram hruaitu hmasate zahna chibai a buk a, "Vawiin hi kan ram dan bu (Constitution of India) siam leh hman ṭanna ni ah hian he dan bu ropuina leh hlutna hre chhuak thar leh ṭheuh ila. Mitin te kan dikna leh chanvo humhalh saka kan awm hi kan vannei takzet a ni," a ti. Republic Day pual hian judo (ca­tegory paruk), carrom board (single leh double), tennis (under - 16) leh 9 ball-ah te inelna buaitsaih a ni a, intihsiakna-a tiṭhate hnenah DC-in lawmman a hlan.

Champhaiah chuan Chhangphut Field-ah lawm a ni a, DC SL Naveen chuan hnam puanzar a pawt pharh a, parade contingent 19-te'n hnam puanzar chibai an bûk a chhang lêt.

Champhai DC chuan Republic Day chu India dan pui duanchhuaha hman anih hriatrengna anih thu sawiin, "India chu mahnia inrelbawl thei, thla pathum pawimawh tak tak legislature, executive leh judiciary nei kan lo ni ta a ni. Republic Day lawmna hmang hian India in zalenna a neih theihna tur leh tun thlenga him taka kan awm theihna tura beitu zawng zawngte kan hriat thar leh angai a ni," a ti. Republic Day lawmnaah hian ṭhalai leh naupangte ruihhlo laka an fihlim theihna tura zirtirna film tawi Champhai District HIMNA-MADAT Documentary Film ‘Hmelma’ tih chu tlangzarh a ni.

Republic Day hi Siaha-ah chuan Meisatla field-ah hman a ni a, district bawrhsap Bhupesh Chaudhary chuan hnam puanzar pawt pharhin, parade contingent 14-te hnam puanzar chibai bûk a chháng.

Republic Day lawmnaah hian Siaha district-a hmeichhia infiamna lam hlawhtlingte hnenah BBBP Girl Achie­ver Award hlan an ni a, award dawngtute chu  footballers - K Ngôpawti, Esther Lalchhuanawmi, Sanra, T Ngôri, Benita Solo leh Vabeisôngia leh boxer L Vanlalduati-te an ni.

Lawngtlaiah chuan Central YLA khelmualah lawm a ni a, DC Shashanka Ala chuan hnam puanzar pawt pharhin, parade contingent 11-te'n hnam puanzar chibai an bûk a chhang lêt.

Shahshanka Ala chuan sorkarin kawng tinrenga mipuite mamawh phuhruk a tum thu sawiin, "Chung kawngah chuan mipui thawhpuina sorkarin a mamawh. Sorkar department hrang hrang bakah, tlawmngai pawl, kohhran, chanchinbumi leh mipuite'n district hma sawnna atana district administration an thawhpui ṭhinnaah lawmthu ka sawi a, min thawhpui zel turin ka sawm nghal a ni," a ti.

Republic Day pual hian volleyball leh badminton-ah inelna buatsaih a ni a, a ti ṭhate hnenah nimin khan lawmman sem nghal a ni.

Serchhipah chuan Republic Day hi Khawtetlang Playground-ah lawm a ni a, DC Dr Lalzirmawia Chhangte chuan hnam puanzar a pawt pharh a, hnam puanzar chibai buktu parade contingent-te chibai bûkna a chhang let.

Dr Lalzirmawia Chhangte chuan, India ram mipuiten keimahni danpui siam ngei kan hman ṭanna champhaah ram hruaitu hmasate zahna chibai bukin, "An inpekna zarah ram hmasawn leh nuam tak kan nei thei a ni. Remna leh muanna hnuaiah hmasawnna tam tak Mizoram pawhin neiin, Serchhip district ngei pawh nasa takin hma a sawn zel a, India rama ziak leh chhiar thiam tamna ber district kan ni ta hial a ni," a ti. 

Republic Day pual hian Serchhipa home hrang hrang te, hospital leh jail-ahte thilpek hlan an ni a, volleyball tournament buatsaih a ni bawk.

Kolasib-ah chuan Kolasib Sports Stadium-ah lawm a ni a, DC Sang­chhin Chinzah chuan hnam puanzar pawt pharhin, hnam puanzar chibai bûktu parade contingent 16-te chibai bûk a chháng. Kolasib DC chuan Kolasib district chuan state dang nena ramri thui tak inṭawm an nih avangin zirna leh Hindi-ah hma an sawn a ṭul thu a sawi.

Republic Day hi Mamitah chuan chuan GSA Playground-ah lawm a ni a, DC Dr Lalrozama'n hnam puanzar pawt pharhin, parade contingent 4-te hnam puanzar chibai bûk a chháng lêt.Dr Lalrozama chuan an district mipui zawng zawngte Republic Day leh kumthar chibai bukin, "Vawiin ni ropui takah hian India ramin mahni kea dinga zalenna a neih theihna tura thisen leh nunna hlu tak hlantu hnam pasal-

ṭhate leh kan hnampa Mahatma Gandhi, Jawaharlal Nehru, Subhash Chandra Bose leh hnam pasaltha kal ta midang zawng zawngte zahna chibai ka buk a ni," a ti.

Saitualah chuan Saitual Public Playground-ah hman a ni a, district bawrsap C Lalpeksanga chuan Hnam Puanzar a pawt pharh a, parade contingent 14-te hnam puanzar chibai an bûk a chháng lêt.

C Lalpeksanga chuan mipuite chu Republic Day chibai a buka,"India Danpui hi khawvela Constitution sei ber leh chipchiar ber a ni a, Danpui hnuaiah hian hnam tlem zawk, chaklo zawk leh hnuaihnung berte pawhin an dikna chanvo an hmuh ngei theihna turte, sakhaw hrang hrang betute leh zuitute pawh tumah duhsak bik leh thlei bik nei loin India ram ropui takah hian zalenna famkim neiin ram Danpui hian min humhalh tlat a ni," a ti.

Hnahthialah chuan HBSC Ground no. I-ah hman a ni a, DC Vanlalmawia'n hnam puanzar a pawt pharh a, parade contingent 12-te'n hnam puanzar chibai an bûk a chhang lêt.

Vanlalmawia chuan India in ama siam Danpui hmangin kum 70 chuang Democracy ram hlawhtling tak a nih thu a sawi a,"India chu kan danpui hian So­vereign, Socialist, Secular, Democratic, Republic ni turin min duanga, chutiang ang tak chuan mahnia ro inrelin, tu ram thuhnuaiah mah awm lo in kan lo awm ta," a ti. Republic Day pual hian Hnahthial Officers' Club (HOC) te chuan Hnah­thial ti hmingṭha tu mi pathum hnenah chawimawina an hlan.

Khawzawlah chuan Republic Day hi Mualvawm Field-ah lawm a ni a, district bawrhsap H Lianzela'n hnam puanzar pawt pharhin, hnam puanzar chibai buktu parade contingent 18-te chibai bûkna a chhang let.

H Lianzela chuan January 26, 1950-ah India Danpui Constitution chu hman ṭan a nih thu sawiin,"hma thlir thui tak nei chungin huaisen takin India ram chu Sovereign, Democratic, Republic ni tur leh a mipuite tan dan hnuaia intluk­tlanna, zalenna leh rorelna dik te a awm theihna tura rahbi thar kaina a ni," a ti. Republic Day lawmnaah hian Khawzawl district huamchhunga in­fiammi hlawhtling hmeichhe pali hnenah Rs. 2,000 ṭheuh hlan a ni.