Kan sorkar chuan ram sq.mile 509-a zau Kan enkawl ve tawh ang kan ti ang - Duhoma

ZNP president Lalduhoma chuan nimin khan an pisaah thuthar thehdarhtute kâwmin, Assam sorkarin Mizoram sq.mile 509-a zauah chhiah an khawn
ṭhin niin a sawi a, "Sorkarna kan chan chuan tun aṭang chuan kan lo enkawl ve tawh ang e, kan ti dawn a ni," a ti.

Lalduhoma chuan, Mizoram leh Assam inkarah Inner Line Reserved Forest (ILRF) sq.mile 509-a zau siam a nih thu sawiin, "Chu chu kan ram chhung a ni tih finfiahna document kan nei. He reserved forest chhunga chhiahte hi district council kan nih lai khan department mumal kan la neih loh avangin kan khawn thei lo a, Assam sorkarin min khawnsak ṭhin a, 30% an ei a, 70% district council-ah khan kum tin an rawn chhung lut ṭhin. Union territory kan nih aṭangin an rawn chhûng ta lo a ni," a ti a; sorkarna an chan chuan chhiah an chhûn loh avangin Assam sorkar chu Court-a an khin dawn thu a sawi.

March 1984-a London-a Laldenga nen India sorkar nena kan inbiak lehna tur point 17 an duan dun zingah ramri thu telh a ni tih sawiin Duhoma chuan, "Kan nawr chhuah loh zingah a tel hlauh. Mizo nationalism leh chumiin a ken tel thilteah hian Mizo mipui hian MNF hruaitute chungah rinna kan nei lian bik ṭhin hle a, March, 8, 2006-a Boundary Commission din a nih theih nana official resolution an rawn put luh kha chuan beiseina kan nei sang hle," a ti.

ZNP President chuan, MNF resolution chu Assembly House-ah lungrual taka pass a nih thu sawiin, "Central-a thehluh tur memorundum buaipui turin Committee din nghal a ni a, party tin leh NGO aiawhte min telh ve a. Home Minister kaihhruaina hnuaiah July 30, 2007-ah Memorundum chu kan peih a, thehlut turin kokim takin Delhi-ah kal ni se kan ti a. Mahse, a chhan sawi loin memorundum chu thehlut loin term an hmang zo a ni," a ti a; memorandum thehluh loh chhan chu an la hrilh thei lo niin a sawi.

Lalduhoma chuan, tun hnaiah Assam nena inrina Medili lui pêlin Mizoram chhungah Assam sorkarin kawngpui an siam tih sawiin, "Hachhek Constituency Development Committee (HCDC) hruaitute'n min rawn hmuin kan sawiho a, ZNP chu a ṭul anga hma la nghal tura kan inpeih thu kan lo hrilh. Amah-erawhchu, party malin hma an lak chuan kan phawkhai a rual loh phah an hlauh avang leh an zàingai tura min ngen avangin kan ngawi rih a ni," a ti.

Bairabi luia buaina chung-changah ZNP President chuan, "Mi eng emaw zat chu Bairabi lui thlang Mizoram chhungah ramri hrûla a dáidoa ṭang turin district council khan leilet pass a pe hlawm a. He lai velah hian Assam-in min rawn nék reng a, kutthlakte pawh an tuar fo. April 2008 khan ramri pêlin Assam-in kawngpui an rawn siam a, leilet zau tak an tichhia a ni," a ti. Ram tihchhiat a nih vang zangnadawmna dilna chu Mizoram sorkarin Bairabi lui thlang lam chu Assam PWD enkawl a nih avangin Assam sorkar hnena dil turin a tih thu a sawi.

Lalduhoma chuan Assam-in a tihchhiatsakte chu an LSC pawh Mizoram sorkar pek ngei a ni thu sawiin, "Kan ta a ni tih lantir nan compensation petu kan nih a ṭula ka hriat avangin, Chief Minister pawh ka sawipui. Assam sorkar hnena compensation an dil vaih chuan awlsam têin compensation chu an pe mai ang a, an pek chuan a ram pawh an ta neih zui dawn tih an rin tlat avangin an dil duh ta lo. Hei hian Congress hotute ngéng a chhun pha tlat lo," a ti.

MNF leh Congress hruaitute kutah Mizoram leilung a him lo nia sawiin Lalduhoma chuan, "Tu tan pawh ramri chinfel hi a awlái lo tih kan hria. Mahse, thâwm takngial pawh chhuah ngam ngai lo sorkar hi kan sit ngawih ngawih a ni," a ti bawk.