DC Office-ah Facilitation Centre hawng

Aizawl DC Office-a Certificate/ILP/Aadhaar Facilitation Centre siam thar chu nimin khan DC Kannan Gopinathan-a'n a hawng. Centre aṭang hian certificate leh lehkha pawimawh dang hrang hrang - tribal/residential/income/ILP/Aadhaar card-te buaipuisak an ni ang.

Aizawl DC tarlan dan-in, Aadhaar card siamna atana thlalak, biometric enrolment chu Aizawl district-ah March 2016 thleng khan kum 5 chung lam mi 3,60,000 vel awm zinga 2,00,000 vel thla lak hman a ni a; chumi hnuah thlalak chhunzawm theih a ni lo vang vang. Mi 1,60,000 chuang Aadhaar nei lo an la awm a, mipui mamawhna a nasat avang-in September 1, 2016 aṭangin Aizawlah chuan Aadhaar card atan thlalak ṭan leh a ni a, September 1 aṭanga November 30 thlengin mi 82,000 chuang thla laksak a ni.

Aadhaar thlalakna atan hian mipui tan senso a awm lo a, miin an duh vang ni loa pawisa chawi tura titu an awm chuan an hming chiang taka hriain DC Office-ah hriattir tur a ni. DC Office-ah man chawi ngai loin Mizoram EPIC/ration dard/driving licence/passport kengin office hun chhungin thla a lak theih reng. Hming leh nihna dik lote chuan Aizawl DC Office-a Census Branch pan tur a ni a; thlalak dik lo erawh chu Aadhaar thla latute kaltlanga tih a ngai.

Tribal, residential leh income certificate-te chu online chauha pek chhuah tawh tur a nih thu tarlangin Aizawl DC chuan, "Manual-a certificate pek chhuah hian harsatna tam tak - duplicate certificate pek te, hmun dang aṭanga verification an dilte leh certificate chhui a ngaihtein a buaithlak ṭhin avangin online-a pek chhuah ṭan a ni," a ti.

Certifcate la turte tana pawimawh

* Tribal, residential leh income certificate tan form pakhat chiah hman a ni tawh dawn a, hei hian a hmaa form pathuma detail ngai leh ngai fill-up ngai tawh loin, form pakhatah a fill-up nghal vek theih tawh dawn. Application form chu DC Office website www.dcaizawl.nic.in ah download theih a ni.

* Electoral roll kimchang, serial no. leh part no. te chu application form-ah fill-up a ngai a, diltu tan a buaithlak ṭhin. Tunah chuan Election department nen ṭangkawpin detail-te chu e-district-in an en thei tawh ang a, diltute tan fill-up ngai tawh loin awlsam takin e-district lamin an fill-up sak thei tawh ang.

* Document thil tel ngaite chu form hnung lamah a inziak a, self attestation chu original document an keng tel a nih chuan pawm a ni. Original an keng tel lo a nih chuan gazetted officer-in an attest chiah pawm a ni thung.