Ramri vei bera inchhál lo turin CM chah

MPC party office bearer-te nimina ṭhu-khawm chuan thuchhuah siamin, chief minister Lal Thanhawla chu ramri vei ber party-a inchhál tawh lo turin an chah.

MPC chuan, kum 1875-a Suakpuilala leh British sokarin Mizote luah chin ram atana inremna an ziah, British aiawha foreign secretary CU Aitchison-a'n hming ziaka a nemngheh chu Mizote ram chinah an ngaih reng thu leh ramri chungchanga MPC party dinna a nih thu an tarlang.

PC sorkarin Brig. Vankunga chairman-na hnuaia Boundary Commission a kalpui tawh chu Congress leh MNF party-te'n an sorkar chhungin tihhlawhtlin tumin hma an la lo nia sawiin, MPC chuan, "Kum 30 a ral hnuah pawh ramri chungchangah harsatna kan la tâwk zel hi pawi kan ti tak zet a ni," an ti.

MPC chuan, chief minister Lal Than-hawla'n ramri vei ber party-a inchhál a, an sorkar apianga boundary commission an din thu a sawi ṭhin chu ramri venhimna leh enkawlna kawngah a hlawhtlinpui lo tih an sawi a, "Enkawlna kawnga a hlawhtling si lo hian a hlawhchhamzia inthup mawi nan maia ramri vei ber party-a inchhál tawh lo turin Chief Minister hi kan chah a ni," tiin an tarlang.