Rajya Sabha-ah CAB pass a ni CAB hi kan thlâwp ve lo - Ronald Sapa
Citizenship Amendment Bill 2019 chu Rajya Sabha-ah nimin khan put luha pass a ni. Member 230 zingah 125-in an thláwp a, 105-in an dodal. Lok Sabha-ah December 10, 2019 khan pass a lo nih tawh avangin, CAB chu hman theih tura pawm a ni ta.
Mizoram Rajya Sabha member Ronald Sapa Tlau chuan nimin khan Parliament session-ah sawihona hun changin Citizenship Amendment Bill (CAB) chu a thlàwp loh thu uar takin a sawi. Ronald Sapa Tlau chuan India hmarchhak mipuite'n India ram chu Hindu lal rama siam an hlauhthawn thu leh an nihna anga awm reng an duh tih sawiin, "CAB hi ṭul kan ti lo va, kan thláwp ve lo a ni," a ti.
Hmarchhak state-ah Chakma foreigner tam tak an awm thu sawiin Ronald Sapa chuan, "Mizoramah a zatve vel an awm a, a zatve dang chu Arunachal Pradesh-ah an awm," a ti a; "Hmarchhak bialah ram leilung fate chîmral an ni mek a, Mizoramah pawh Chakma foreigner tam tak an awm avangin, CAB chu Mizo mipuite hlauhthawnna siamtu a ni," a ti. Mizoram MP chuan, India ramah sakhuana thila intihduhdahna a nasat thu te, India chu khawvela Kristiante tihduhdahna thlen tam lamah 15-na a nih thu te, biak-in tihchhiat leh hâl a nih fo thute sawiin, "India hi Kristiante leh hnam tenâu leh hnuaihnungte tihduhdahna hmunah a chang tawh a ni," a ti. CAB chu Kristiante leh hnam tenau dangte humhimna tur tia sawimawina chu hnialin, "He thilah hian in ti tak zet em tih hi ka ngaihtuah. India rama intihduhdahna thlengte hi tihtàwp a ni tih ka hmu duh a ni," a ti.
Lok Sabha-ah CAB pass a nih avanga tuna hmarchhak dinhmun sawiin Ronald-a chuan, "Dodalna nasa tak a awm mek a, tàwp loin buaina a chhuak mek, hmun tinah kangmei a chhuak a, tharum thawhna avangin nunphung a khaihlak a, heti chunga CAB hi pass luih a nih chuan hmarchhak mipuite chu engmah loah house hian a ngai tihna a ni," a ti a; CAB hi hman a nih hunah hmarchhak mipuiin an dinhmun tur leh Kristiante dinhmun tur hriat an duh thu sawiin, "India rama awm zel tur hian Constitution-in zalenna a pêk ang taka awm a, mahni hnam ṭawng te, tribal an nihna te, an hnam nunphungte leh an rilru ang taka nun zel an duh a ni," a ti bawk.
Home minister Amit Shah chuan khaikhawmna thu sawiin, CAB chuan sakhaw tenâu a tibuai dawn lo a, India khua leh tui ni sate tan harsatna engmah a thlen dawn lo tih a tiam a. Member-te'n pawm ngam turin a ngen.
Darkar sarih zet sawiho a nih hnuah CAB-a bung hrang hrangah vote lak a ni a, a pumpuiah CAB thláwptu 125, thláwp lotu 105 awmin Rajya Sabha chuan CAB chu a pawm ta a ni.