MPCC leh ZPM-in CAB an dodal CAB tihdanglam danah MBJP an lawm

Mizorama eptu party zingah Mizoram Pradesh Congress Committee (MPCC) leh Zoram Peoples' Movement (ZPM) chuan Citizenship Amendment Bill (CAB) an thlâwp lo a, Mizoram Bharatiya Janata Party (BJP) chuan CAB tihdanglam a nih dan lawmawm an ti thung.

MPCC president Lal Thanhawla chuan Vanglaini palai zawhna chhangin, CAB chuan Mizoram huam lo mahse an pawm thei lo tih a sawi a, "A thil tum a chiang a, hmarchhak min chîmral tumna a ni. An tum a chianna chhan chu - Bangladesh, Pakistan leh Afghanistan an huamtir laiin, ṭhenawm ram tho Myanmar erawh an telh ve lo. State lian ber Assam pawhin an duh lo," a ti.

ILP awmna state-te a huam tir loh chhan chu, hmarchhak pumpuiah bandh leh kawngzawhte huaihawt a nih vang tih sawiin MPCC President chuan, "A second thought mai mai a ni. Lawmna tur a awm lo. Tih pawh an ti tak tak ang em?" a ti a; CAB-in Mizoram a huam lo tak tak a nih pawhin, BJP chuan nakin lawkah Uniform Civil Code kalpui leh an tum thu a sawi.

Lal Thanhawla chuan, Mizoram Lok Sabha MP C Lalrosanga'n BJP a thlàwp chhan chu, MNF-te BJP lama an ṭan loh ngam loh vang nia a ngaih thu sawiin, "Kan hriat dan chuan, kan MP hi an ko a, an lama ṭang a nih leh nih loh an zâwt a, an lama a ṭanzia a tilang ni-ah kan ngai. An hotupain kan do a ti a, an dona ka hmu lo. An do tak tak a nih chuan an MP-in a support lo ang. A nih loh chuan action an la tur a ni," a ti.

Vanglaini palai zawhna chhangin ZPM president Lalliansawta chuan, CAB chu sakhaw behchhan taka duan a nih avangin a him lo an tih thu a sawi a, "India rama Hindu lal ram siam tumna tih a chiang. Hmarchhak state a ṭhen an huamtir a, a ṭhen an huamtir lo hi nakin zela kan ṭanrualna tur ṭhiah tumna a ni em aw," a ti a, Mizoram Lok Sabha MP chu ZPM party mi ni se chuan CAB a thlàwp loh tur thu a sawi.

Lalliansawta chuan, BJP-te'n thil lian tham zawk phawrh zel an tum thu sawiin, "CAB hrim hrim kan welcome lo, nakin zel kan ngaihtuah a ngai. BJP thil tum hi kan hrethiam lo ang tih a hlauhawm a ni," a ti. Vanglaini palai zawhna chhangin Mizoram BJP president Prof. JV Hluna chuan, CAB kalpui a nih dan chu lawmawm an tih thu a sawi a, "A tìra kan demand ang chiah a ni. Synod hian lawmthu sawi ṭawngṭaina buatsaih se kan ti hle. Article 371 an khawih loh tur thu leh ILP chungchang Parliament-a sawi chhuah leh a nite kha a lawmawm hle. Kan beisei phâk tawh loh thil a ni," a ti.

Prof. JV Hluna chuan, Lok Sabha MP C Lalrosanga'n CAB a support thu a sawi chu lawmawm an tih thu sawiin, "Ti ṭha kan tih avangin lawmpuina kan thawn vek tawh. CAB a thlàwp chhan a sawifiah ṭha a, ti ṭha kan ti tak zet a ni," a ti a; CAB chu ṭha ti mah se, NESO ruahman anga total bandh MZP-te'n inunauna atana an huaihawt erawh an thlàwp thu a sawi.