Dy.CM-in bawlhhlawh paihna thar a hawng

Aizawl khawpui bawlhhlawh paihna tur hmun siam thar, Aizawl Solid Waste Management Centre, Tuirial chu nimin khan UDPA department changtu deputy chief minister Tawnluia'n a hawng.

Aizawl Solid Waste Management Centre hi State Investment Programme Management and Implementation Unit (SIPMIU), Aizawlin North East Capital Cities Development Implementation Prog-ramme (NERCCDIP) hnuaia an siam a ni a; SIPMIU chuan Aizawl Municipal Corporation (AMC) hnenah a hlân dawn a ni.

Dy. Chief Minister chuan, khawpui a faia a thianghlim zawk theihna tura sorkarin ruahmanna a siam leh bawlhhlawh paihna a siamte chu mipui­in an thlàwp ṭhat a ṭul thu a sawi a, "Mipuite'n kan tihmâkmawh chu, sorkar hmalakna thláwp chunga mimal tinte'n kan in chhungkhurah bawlhhlawh thliar fel hi a ni," a ti a; bawlhhlawh ṭawih thei leh ṭawih thei lote uluk taka thliar zel tawh turin mipui a ngen.

AMC mayor PC Lal-hmingthanga chuan, bawlhhlawh paihna hmun thar chu hman tak tak a nih dawn tâk avangin mi tin, chhungkaw tinin an ina bawlhhlawhte felfai taka an thliar a ngai tawh dawn tih a sawi a; chutih rualin, Aizawlah pawh bawlhhlawh la thliar ṭha lo tam tak an awm tih sawiin, "Tun dinhmun en hi chuan, he hmun thar pawh hi veng 19, a thliar ṭha zual bik tan chauh kan hmang rih dawn a ni," a ti.

UDPA secretary Dr C Vanlalramsanga pawhin thu sawiin, "Urban development hi thawh harsa a ni a, khawpui kan tâwt tawh a, amaherawhchu, theihtawpin kan thawk zel a, hmasawnna atan ke kan pên zel a ni," a ti bawk.

Hawnna inkhawm hi bawlhhlawh paihna thar hmunah hman a ni a, UDPA secretary Dr C Vanlalramsanga'n a kai­hruai a, SIPMIU project director Lalrothanga'n hnathawh dante a sawi.

SIPMIU tarlan dan­in, sorkar hmalaknain SIPMIU chuan Aizawl khawpui hmasawnna tur leh a thiang­hlim theih zawk nan ruahmanna hrang hrang a kalpui a, chu'ng zingah chuan bawlhhlawh awmze neia sawngbawlna (Aizawl Solid Waste Management Centre) a tel. Bawlhhlawh paihna hmun thar hi Muni­cipal Solid Waste (Management & Handling) Rules, 2016 anga siam a ni a, chu dan hnuaiah chuan bawlhhlawh hâl khûk phal a ni lo a, bawlhhlawh ṭawih thei leh ṭawih thei lo thliar hran tur a ni a, kut lâwngin bawlhhlawh khawih loh tur a ni bawk.

Aizawl Solid Waste Management Centre-ah hian bawlhhlawh phur lirthei bûkna tur weighbridge pahnih dah a ni. Bawlhhlawh ṭawih theite chu sâwngbàwl zuiin, leiṭha siam nan hman a ni dawn a; leiṭha siamna hmanrua Mechanical Compost Plant (ni khata kg. 50,000 sâwngbâwl thei) leh Vermi-Compost Plant (ni khata kg. 22,000 dawng) bun a ni.

Bawlhhlawh ṭawih thei lo, hman nawn theih leh hralh leh theih turte thliar hranna hmun Waste Resource Centre bun a ni a, chu chuan ni khatah kg. 74,000 a khawih thei dawn. Bawlhhlawh ṭangkaina nei tawh lote phûm bona tur, Sanitary Landfill Centre siam a ni bawk a, ni khatah kg. 44,000 paih theihna tura duan niin, kum nga daih tura siam a ni.