KHAWTHLIR

UGC-Women’s Studies Centre, Indian Institute of Mass Communication, Mizoram University-a Health & Culinary Club leh Mizo Dance Camp-te chuan November 21, 2019-a MZU Park-a Charity Show an buatsaiha sum an hmuhte chu nimin khan Central Women’s Jail hnenah an hlan. Christmas Charity Visit Programme an neihah hian Mizoram State Commission for Women chairperson Lallawmchhungi khuallian a ni a, inspector general (Prison) Maria CT Zuali khualzahawm a ni a; jail táng hmeichhia puitling 52, hmeichhe naupang pahnih leh mipa naupang pakhatte tan thilpek Rs. 20,000 hû an hlân a ni.

Laithangpuii College of Pharmacy chuan nimin khan Aizawl Civil Hospital Blood Bank-ah kalin, thisen unit 27 an pe a, a petute mipa 18 leh hmeichhia pakua an ni.

Delhi Mizo Zirlai Pawl (DMZP) chuan thuchhuah siamin, Mizoram Lok Sabha MP C Lalrosanga'n Citizenship Amendment Bill (CAB) a thláwp chu pawi an tih thu leh, CAB chu DMZP-in an pawm theih dawn loh thu an tarlang. DMZP chuan, "Ni 9.12.2019 (Thawhṭanni)-a Lok Sabha-a CAB put luh a nih chungchanga sawizuinaa kan Lok Sabha MP zahawm tak Pu C Lalrosanga’n Bill pawm zawnga thu a sawi kha pawi kan ti em em a ni. DMZP chuan CAB hi Parliament-a put luh a nih hma a ṭangin a dodal tawh a, Bill ennawn a nih hnuah Mizoram huam teltir lo mah se, engtik lai mahin he Bill hi kan pawm thei dawn lo a ni," an ti.

Mizoram Health Multipurpose Service Association (MHMSA) chuan nimin khan Chanmari YMA Hall-ah General Conference vawi 37-na an hmang a, Health minister Dr R Lalthangliana'n a hawng. Minister chuan, sorkarin health worker hna ruak 200 awm chu kum tharah hnawhkhah a tum thu leh community health officer post ruak 32 pawh sorkarah thlen mek a nih thu a sawi. MHMSA conference hi vawiinah chhunzawm a ni ang.