Governor Pillaia'n Lawngtlai a tlawh

Governor PS Sreedharan Pillai chuan nimin khan Lawng­tlai a tlawh a; India danpuiin 6th Schedule hnuaia Governor mawhphurhna a pek angin district council chhunga chengte hmasawnna atan theihtawp chhuah a tum thu sawiin, thawhpuiah a sáwm.

Larsap hian chawhma dar 9:50-ah helicopter-in Lawngtlai a thleng a, police-te'n guard of honour lo pein, Lawngtlai DC Shashanka Ala, LADC chief executive member T Zakunga leh chairman V Zirsanga, Lawngtlai SP Amit Goel leh sorkar hotu dangte'n an lo dawngsawng a ni.

LADC Complex-a amah lawmna inkhawmah PS Sree­dharan Pillai chuan, Mizoram Governor a nih ṭan aṭangin Mizorama autonomous district council (ADC) pathum tlawh chhuah a tum lâwk thu a sawi a, "Mi tin huap zo leh ban phâk hmasawnna tura hna thawh hi ram hruaitute leh sorkar hnathawkte leh political party zawng zawng mawhphurhna a ni a, democracy ram kan nih angin mipui hamṭhatna leh mipui duh dan a lal ber tur a ni," a ti a; thingtlang kilkhâwr ber thlengin inkalpawhna kawngpui ṭha sial ngaih pawimawh hmasak a ṭul thu a sawi.

Larsap chuan, "India Danpuia 6th Schedule-in Governor mawhphurhna a pek angin, district council chhunga chengte hmasawnna atan theihtawp chhuah ka tum a, mipuite thawhpuiah ka sáwm a che u," a ti a; Lawngtlaia sorkar hotute chu an harsatna leh an duh dante a hnena thlen ṭhin turin a chah.

LADC CEM T Zakunga pawhin thu sawiin, Governor-in LADC a tlawh chu thil chhin­chhiahtlak a nih thu a sawi a, LADC hnuaia hmasawnna hnathawh tlangpui a tarlang. T Zakunga chuan, LADC-a hna ruak awm hnawhkhah leh thawktu sîksawi khapna September 13, 2019-a tihchhuah chu sût tur leh LADC hnuaia hmasawnna hna thawhna tur sum tam zawk state sorkar aṭanga hmuh a nih theih nana hma lakpui turin a ngen a ni.

Governor hian Lawngtlai District Hospital leh Kaladan Multi Modal Transit Transport Project kawngpui a tlawh a; Circuit House-ah tlawmngai pawl, kohhran leh political party hruaitute leh, Mizoram sorkara department hotute a kâwm bawk. Mi pawimawhte a kawm hlànin a nupuiin Southern Standard Middle School leh Lairam Motherless Home-te a tlawh bawk a ni.