Insumdawn tawn dan tur sawiho a ni

Mizoram Agricultural Marketing (MAMB), International Fund for Agricultural Development (IFAD) leh Mission Organic Mizoram (MOM) te chuan nimin khan Aijal Club-ah ‘Private Sector Round Table on Mizo Ginger cum Buyer Seller Meet 2026’ an buatsaih a, Horticulture minister C Lalsawivunga'n a hmanpui.

Horticulture Minister chuan, sorkarin loneitute leh kut hnathawkte eizawnna tihhmasawn a, an dinhmun chawikân a ngaih pawimawh thu a sawi a, "Mizorama kan thlai tharte hi chemical tel lo (organic) an nih avangin a quality a ṭhain an hrisel bik a ni," a ti.

NiTi Aayog-in Mizoram chu Ginger Capital of India-ah a puan thu sawiin C Lalsawivunga chuan, "Mizoram sawhthing hi a ṭhain a rimtui bik. Kan rama kan thar thlai leh thil dangte lei tura Mizoram pawn aṭang lo kalte chungah kan lawm hle," a ti a, Buyer Seller Meet hlawk tak nei turin duhsakna a hlan.

Meet-ah hian India ram hmun hrang hrang aṭangin investor leh buyer liante sâwm an ni a; NAB Venture, IRMA Iseed, Acumen, ABC Fruits, Rupiya.app, Apple leh NSRCEL te an tel. Anni hian Mizorama thlai tharte leh sawngbawl tawhte lei leh hralh kawnga Mizoram sorkar thawhho theih dan turah rawtna an thlen a ni.

Zozik, Bio Farm, C Breeze, Tuibawn leh Lawm from the Hills te nen pawh thawhho theih dan tur sawiho a ni a; chawhnu lamah B2B session hman niin, buyer leh seller-te dawhkan khat kilin an inkâwm.

Buyer Seller Meet-ah hian Ropuiliani Farmers Producers Company leh Kisaansay leh IRMA Iseed leh Mizoram Startup Mission ten thawhhona thuthlung an ziak bawk.