Unau hmel hai cháng awm tawh mah se, inngaihdam tawn a ṭul - Assembly Speaker

Zo Reunification Organisation (ZoRO) chuan nimin khan Lal Thanhawla Auditorium-ah Chin Lushai Conference vawi 134-na champha lawmna an buatsaih a; khuallian Lalbiakzama, Assembly speraker chuan, Zo hnahthlak zingah unau hmel hai cháng awm tawh mah se, inngaidam tawn a ṭul thu a sawi.

Assembly Speaker chuan, Mizote chu an duh vang ni loin India, Myanmar leh Bangladesh-ah ṭhendarh an nih thu sawiin, "Ramri siam chawpin min daidan rei tawh avangin kan ṭawng, kan sûkthlêk, kan hawi her, kan ngaihsan zawng chenin a inang lo hret hret a, mahse, thlah khat, unau, chhûl khat kual na nâ nâ chu kan danglam thui thei tak tak lo," a ti.

Zo hnahthlakte chu inngeih taka awm a ṭul thu sawiin Lalbiakzamah chuan, "Unau hmel hai chángte lo awm tawh mah se, lo inhmumawh tawh ṭhin mah ila, kan tlin lohnaah inngaidam tawn ila. Inngaihdamna nen kan thawhho chuan kan dingchhuak ang," a ti a; unau indo an dingchhuak ngai lo tih a sawi.

Lalbiakzama chuan, Zo fate chu an chhehvelah hnam lian zawkte'n an hual vel tih sawiin, "Kan ṭanho tlat loh chuan nêkchêp leh chîmral theih reng dinhmunah kan ding. Zo fate rorelna pakhat hnuaiah awm thei rih lo mah ila, tih theih pakhat kan nei, chu chu thinlung hmun khat pûa awm hi a ni," a ti a; ZoRO chu Zo fate insuih khâwm theih nan ṭan la zel turin a chah a, ZoRO hmalakna thláwp turin Mizoram mipui a sáwm.

ZoRO patron Lalthansanga, minister pawhin thu sawiin, ZoRO hmalakna chu Zo fate insuih khawmna tur leh ram dinchhuahna tur a nih avangin thláwp turin Mizoram mipui a sáwm a, "Zofa unaute inkarah intihbuaina hrang hrang a awmin, remna palai ZoRO-in a thawh hi a ropui a, ZoRO vangin remna pawh a lo thleng tawh ṭhin a ni," a ti.

Inkhawm hi ZoRO president R Sangkawia'n a kaihruai a; Mizorama ZoRO zone hruaitu te, Myanmar, Bangladesh, Tripura, Manipur leh Assam aṭangin palai eng emaw zat an tel. Adviser to CM Lalmuanpuia Punte, MZP president C Lalremruata leh MSU president B Lalkhawngaihzuala te pawhin thu an sawi.

Chin Lushai Conference hmasa ber chu January 29, 1892 khan Calcutta-a Fort William-ah neih a ni.

INKHAWM THUROLUM (Ṭhenkhat)

▶ India, Myanmar leh Bangla-desh-a cheng Zo fate hi thlahtu thuhmun, thisen inzawm, serh leh sâng inkhawih pawlh thei, inṭhen thei lo, unau kan ni.

▶ Chin-Lushai Conference, 1892 Thurolum bawhzuia Zo fate India, Burma leh Bangladesha awmte insuihkhawm leh a, rorelna pakhat hnuaia kan awm theihna tura ZoRO-in hmalakna kan pawm a, a tawp thlengin lungrual takin kan bei zel ang.

▶ Inlungrualna tichhe zawng leh inunauna ṭhendarh zawnga hmalakna reng reng a tawp thengin kan do tlang zel dawn.

▶ India, Myanmar ramria daidanna bang siam (border fencing) hi Zo fate min ṭhendarhtu tur a nih avangin kan duh lo a, kan dodal zel ang. Zalen taka kan intlawhpawh theihna (Free Movement Regime) tihtâwp pawh kan remti lo.