Zirna hian hmun sáng chang rawh se tih hi ka au hla a ni - Edn. Minister

School Education mi­nister Lalchhandama Ralte chuan nimin khan Mizoram Middle School Tea­chers Association (MSTA) Annual Conference a hmanpui­naah thu sawiin, 'Zirnain hmun sang chang rawh se' tih chu a auhla a nih thu leh, sorkar sikula zirtirtute'n zirlaite híp turin rimtui an chhuah a ngaih thu a sawi.

Lalchhandama Ralte chuan, School Education department chu sorkar department 45-a thawktu zinga 30% thawhna a ni tih sawiin, "Zirna dah hniamna hmunah ram a tluchhe ṭhin a, chuvangin, education hian hmun sang ber chang rawh se, tih hi ka auhla a ni. Kan khawhawi hian kan ram hi a al thei. Kil tina thawktute'n kan hna ṭheuh ṭha taka kan thawh chuan kan ram hi kan chawi kâng dawn a ni," a ti.

Mipuiin zirna ṭha an dawn theih nan sorkarin sum leh pai tam tak séngin hma a la tih sawiin Minister chuan, "Chutih laiin, enrolment a tlahniam a, nu leh pate'n an fate private school lamah an luhtir duh zawk a, kan zirtirtute hian zirlai hîp tur­in par rimtui chhuah a ṭul ta a ni," a ti a; zirtirtute chu kum tharah zirlai an neih tam zawk theihna turin tlawmngai pawlte phungbawma sáwma ṭan la turin a fuih.

School Education Minister chuan, school inspection (sikul endik) chu sorkarin uar a ṭul tih a hria tih sawiin, "Uluk zawkin kalpui a ni dawn," a ti a; zirtirtute chu an kutah zirlaite an awm tih hria a, ṭan la thar turin a chah bawk. Synod Conference Centre-a neih MSTA Annual Conference hi an pre­si­dent Rosangzuala'n a kaihruai a; chaw­hnu lamah ro an rêl. MSTA-ah hian member 2,479 an awm mek a ni.