Vawiinah National Voters Day Rally

Mera Yuva Bharat, Mizoram hotute chuan nimin khan Aizawl Press Club-ah thuthar thehdarhtute an kawm a; National Voter's Day (January 25) pualin vawiin hian Sport Authority of India (SAI) leh T Romana College nen ṭanghoin Aizawlah National Voters Day Padyatra (rally) an buatsaih dawn ttih sawiin, kawngzawha tel turin vote nei tharte an sáwm.

Mera Yuva Bharat, Mizoram director Mercy Sellate chuan, National Voter's Day chu Ministry of Youth Affairs & Sports-in 'My Bharat, My Vote' tih thupuia hmangin ṭhalaite ram inrêlbawlna huanga teltir a, vote thlak chu ram hmasawnna atana an mawhphurhna a ni tih an hriat tharna turin hma a lak thu a sawi a, "January 25 hi Pathianni a nih avangin hotute remtihna angin Mizoramah chuan January 25-30 chhungin district leh state level-ah programme hman a ni a, Aizawlah chuan January 30 (vawiin) hian Padyatra/Rally neih a ni dawn," a ti.

Kawngzawh chu T Romana College leh SAI te nen ṭanghoa neih tur a nih thu sawiin Mercy Sellate chuan, "Vote nei tharte'n hruaitu ṭha tur thlan chu an mawhphurhna a ni tih an inhriat nan te, ṭhalaite'n an hriselna ngaih pawimawh a ṭulzia inzirtir nan SAI programme Cycle on Sunday nen kaih kawp a ni," a ti a; rally-ah vote nei tharte hnenah lawmpuina hlan a ni dawn tih a sawi.

Mercy Sellate tarlan danin, MyBharat portal-ah kum 18-29 inkar an inziak lut thei a, inziak lutte chu My Bharat volunteer ni nghalin, tunah Mizoramah ṭhalai 80,000 vel an inziak lut tawh. My Bharat volunteer-te leh vote nei tharte chu kawngzawhah tel vek turin an sáwm a ni.