Khatla kawngpui sira thei zuarte insawn turin AMC-in a hriattir

Khatlaa MLA Hostel (Aijal Club bul) chu sak ṭhat a nih dawn avangin lei laih a ni dawn a; hei vang hian a hnuai kawngpui sira thei zuartu mi 11-te chu Aizawl Municipal Corporation chuan AMC Multi-Complex, Tuikual South-ah insawn turin an hriattir.

AMC tarlan danin, MLA Hostel thlang kawngpui sir (Land Revenue directorate bul) chhak lam chu lirthei hûnna (parking area) a ni ṭhin a; December 3, 2019 khan AMC leh Thei zuar Association ten thei zawrhna hmun atana hman turin inremna an ziak. Inremna chu May 19, 2022-ah ziah nawn niin, June 30, 2023 thleng ṭhut phalsak an ni a, a hnu lama an ṭhut dan pawh AMC ruahman angin inremna siam zel a ni. September 12, 2024 khan Street Vending Zone atan puan zui a ni bawk.

AMC chuan thei zuartute chu insawntir tura tihna lehkha Mizoram Legislative Assembly Under Secretary (GA) aṭangin UDPA department kaltlangin September 6, 2024 khan an dawng a; sawnna hmun dang remchang a awm loh thu AMC chuan September 18, 2024 khan UDPA an hrilh.

MLA Hostel sak ṭhat a nih dawn avangin thei zuartute insawntir tura ngenna AMC chuan September 24, 2025 khan PWD aṭangin an dawng a; AMC chuan January 6, 2026 khan Thei Zuar Association President hnenah insawn tura hriattirna an pe a, January 16, 2026 ral hmaa AMC Multicomplex, Tuikual South 3rd Floor-ah insawn turin an hriattir a ni.

Thei zuartute chu an insawn loh avangin AMC chuan January 23, 2026 khan show cause notice an pe a; thei zuartute chuan Land Revenue pisa bula ṭhut dil mah se, AMC chuan a phalsak lo a, AMC Multicomplex-a insawn turin a hriattir leh a ni.