KHAWTHLIR

Sapthei leisak tum

MIFCO chairman Lalṭhazuala Rawite chuan nimin khan Chawngtlai khuaa sapthei chingtute leh khawtlang hruaitute a kâwm a, sapthei chinna hmunte a tlawh bawk a; sapthei hralhnaah buaina an neih loh nan MIFCO-in theihtawp a chhuah dawn thu a sawi. Chawngtlaia chhungkua 404 zinga 247-in sapthei an ching a, kum 2025 khan quintal 1,500 vel an thar a, kumin tam zawk thar an inbeisei a ni.

YMA-in thisen pe

Kanghmun South Branch YMA chuan nimin khan an YMA Hall-ah thisen pek an huaihawt a; Serchhip District Hospital tan thisen unit 42 an pe a, petute mipa 26 leh hmeichhia 16 an ni.

Casualty sawn dawn

Civil Hospital, Aizawl (CHA) Emergency department chu vawiin hian CHA Trauma Centre building-ah an insawn dawn a, hei vang hian zing dar 9 aṭangin dawr theih an nih dawn lo. Tlai dar 5 aṭangin dàwr theih tura an inpeih hman an beisei thu CHA Senior Medical Superintendent chuan a tarlang.

Sampoornata Abhiyan

Lungsen Aspirational Block-a hmasawnna tehfung (indicator)-te hlen chhuah a nih theih nana NITI Aayog hnuaia beihpui thlak tur 'Sampoornata Abhiyan 2.0' chu nimin khan Lungsen BDO Lalhruailiana Zote-in BDO Complex-ah a hawng. Sampoornata Abhiyan 2.0 hi January 28 - April 14, 2026 chhung kalpui a ni dawn a, hriselna leh chawṭha, zirna leh kut hnathawh kaihhnawih tehfung paruk bitum bik neiin hmalak a ni ang.

Ruihhlo do zel dan tur sawiho

Lawngtlai bawrhsap Donny Lalruatsanga hoin nimin khan ruihhlo donaa hmalak zel dan tur ngaihtuahin District NCORD leh Operation Jericho hotute an ṭhukhawm. Febuary 2026 chhunga Rescue Centre leh Dropping Center enfiah te, damdawi dawrte chungchangah DC, CMO, CYLA-te nena ṭhutkhawm an rel.