MPC-in MNF leh Lok Sabha MP an dem

MPC party office bearer-te chuan an president Lalhmangaiha Sailo kaihhruaiin nimin khan an pisaah emergency meeting an nei a; thu­chhuah siam nghalin, Mizoram Lok Sabha MP C Lalrosanga'n Parliament-ah Citizenship Amendment Bill (CAB) a thláwp chu an dem tak zet thu an tarlang.

MPC chuan, "Mizorama political party hrang hrang, NGO, zirlai pawl leh kohhrante'n Mizoram tana him lo CAB duh loa nasa taka kan dodal laia Mizoram, Kristian state aṭanga Lok Sabha MP kan neihchhun Pu C Lalrosanga’n CAB thláwp­ zawnga vote a pe ta mai hi MNF party-in Mizo hnam leh Kristianna aia Hinduism an ngaih pawimawh zawkzia a tilang chiang hle a, kan dem tak zet a ni," an ti. 

Inner Line Permit (ILP) hman mekna hmar­chhak state-ah CAB hman a ni ve dawn lo tih chuan CAB laka Mizoram himna tluantling a keng lo tih sawiin MPC chuan, "Mizote tribal kan nihna leh ILP hmanna state kan nihna hian CAB hmalakna leh thil tum laka him tura min sawi thlamuanna hi thiam taka inbum tumna maiah kan ngai," an ti a; CAB chu Indian Constitution innghahna 'Sakhaw zalenna' kalh, sakhaw inthleina keng tel bill a nih avangin Kristian MP tan chuan dodal ngei ngei chi a nih thu an sawi.

MPC party chuan, "Hindu lalna ram tun din tlat tuma chak taka hmalakna kalpuitu BJP ṭawiawma MNF party-in Pu C Lalrosanga hmanga hma an la duh ta mai hi Mizoram tan, Mizo hnam tan a him loin a mualphothlak tak zet. Mizote Kristianna rilru aia Hindu kulmûkte duh dan zawka MNF hmalakna hi ringlo mite nen a ngháwngkawl bah tlânna tak meuhah kan ngai a ni," an ti. Nimina MPC office bearer-te ṭhukhawm hian vawiina PRISM party nen an inbiak lehna tur chung­chang an sawiho a ni.