Assembly Speaker-in FLAM inkhawmpui a hmanpui

MLA lo ni tawhte intelkhawmna Former Legislator Association of Mizoram (FLAM) chuan nimin khan Assembly Annexe conference hall-ah inkhawmpui an hmang a, Assembly speaker Lalbiakzama'n a hmanpui.

Assembly Speaker chuan Assembly House thar sakna tur hmun ṭha zawn mek a nih thu sawiin, "Plan leh sum senso ngaizat turte kan ruahman chho mek," a ti.

Lalbiakzama chuan FLAM hmasawnnate leh an hamṭhatna tur atana sorkar hnathawhte sawiin, "Deputy speaker designated bungalow tur chu a hmun ruahman felin sak ṭan mai tura tih fel a ni tawh. MLA Hostel hlui pawh ṭhiah fel a ni tawh a, SASCI sum hmangin sak a ni dawn. Amaherawhchu a hmun tura duana theizuarte chuan an insawnna tura ruahmansak an duh lo a, mihring inlainatnain ngaihchan mek an ni," a ti a, a ṭul anga bawhzui a nih thu a sawi.

Kum 2026-2028 FLAM hruaitu atan president-ah Liansuama, vice president-ah Dr JV Hluna leh tresurer-ah Rochhunga Ralte chuhtu awm loa thlan tlin an ni.