KHAWTHLIR

Voters Day rally

Ministry of Youth Affairs & Sports hnuaia Mera Yuva Bharat bultumin nimin khan T Romana College-ah ‘National Voters Day Padyatra (Rally)’ neih a ni a; chief electoral officer Dr Lalrozama'n a hmanpui. Kawng zawhnaah hian thupui atan ‘My Bharat My Vote - Celebrating Young Voters’ of Viksit Bharat’ tih hman niin, Central YMA general secretary Prof. Malsawmliana'n a vailiam a; Mera Yuva Bharat, Mizoram state director Mercy Sellate chuan inlawmna thu sawiin, inthlanna thianghlim nei turin thutiam an sawirual bakah vote nei tharte lawmna hun hman a ni.

Vertherah puh

ZPM chuan nimin khan an pisaah chhung inkhawm an hmang a, thusawitu ZPM general secretary PB Lalsawmliana chuan, MNF leh Congress Party-te chu Mizoram ṭhatna aia mahni pumpui leh party hmangaih zawkte an nih thu sawiin, "ZPM a pian hma phei chuan anni party pahnih bak rorel tur an awm loh avangin an thil tihsual leh tih dik lohte pawh inthuppui duh khawpa politics huanga verther an ni," a ti.

Vakhiang humhalh

Champhai divisional forest officer (DFO) Lalbiakchama Chawngthu chuan hriattirna tichhuakin, "January 28, 2026-a District Level Fire Prevention Committee ṭhutkhawmnaah sava mawi leh váng tak - Vakhiang (red-billed blue magpie) chu kâp an lo awm ṭhin avangin an tlèm sàwt thu tarlan a ni a, heng sava kap kan hria emaw, kan hmu emaw a nih chuan DFO office-ah hriattir vat tur a ni," a ti.

Hnathawh endik

January 29, 2026 khan Mizoram State Project Monitoring Committee Inspecting Team chuan Improvement of Road from Ainawn to Tuithum hnathawh mek an endik. He project hi SASCI 2024-2025 scheme hnuaia cheng vbc 18.51 senga thawh, km. 4.682 a thui a ni a, hna hi 30% thawh tawh a ni.