Larsapin NCC Group Hqrs a hawng

31st January, 2026

Larsap Gen VK Singh chuan nimin khan MZU Auditorium-ah Mizoram puala din NCC Group Headquarters, Aizawl a hawng a, Group HQ NCC, Aizawl puala siam 'My Stamp' a tlangzarh nghal.

Mizoramin ama pual liau liau NCC Group HQ a nei ta chu lawmawm a tih thu sawiin Larsap chuan, "Mizoram tana ni chhinchhiah tlak leh hmasawnna mellung pawimawh tak a ni. Kum 1964 aṭangin NCC-in Mizoramah hmalakna leh hlawhtlinna chhuanawm tak tak a nei. Inthununna leh hun remchang thalaite siam sak kawngah NCC aia thawh hlawk ṭhalaite telna pawl dang a awm bik lo," a ti.

Larsap chuan NCC Group HQ, Aizawl hawn fel tak chuan Mizoram ṭhalaite zingah NCC hmalakna a ṭhanlen zual tir dawn tih sawiin, NCC cadet-te chu an thupui 'Inpumkhatna leh Inthununna' tih chu ṭha taka zawm tlat turin a fuih," a ti.

Adventure tourism tih hmasawn kawnga Mizoram saorkar hmalakna fakawm a tih thu sawiin Larsap chuan, "NCC cadet-te pawh hetiang lama an tel tam zel ka beisei. State sorkarin theihtawp a chhuah zel dawn," a ti a, NCC Mizoram chu an kalzelna turah duhsakna a hlan.

Inkhawmah hian Sports & Youth Services minister Lalnghinglova Hmar, MLA Lt Col Clement Lalhmingthanga, MZU vice chancellor Prof Dibakar Chandra Deka leh NCC ADG Maj Gen Anurag Vij te pawh an tel.

Mizorama NCC batallion hrang hrangte hi Silchar Headquarters hnuaiah a awm ṭhin a, tunah chuan brigadier ṭhutchilhin Aizawlah ngei group headquarters Mizoramin a nei tawh dawn. NCC hi Mizoramah kum 1964 khan din niin, tun dinhmunah hian batallion 4 awm mekin, Aizawlah battalion pathum (20 Mizoram Bn NCC, 1 Mizoram Bn NCC leh 1 Mizoram Air Sqn NCC) te awm mekin, Lungleiah battalion pakhat (2 Mizoram Bn NCC) a awm.

Mizoram sorkar chuan June 18, 2024 khan NCC Group HQ, Aizawl din turin sanction letter a tichhuak. Hmalak chhoh nghal niin July - October, 2025 chhung khan Aizawlah Group Commander, Deputy Group Commander leh Training Officer-te dah an ni. NCC Group HQ, Aizawl hawn tur khuhhawn nan January 29, 2026 khan Chief Minister-in NCC Group HQ, Aizawl puanzar a lo tlangzarh tawh a ni.