District MJA-te'n inkhawmpui an hmang

Nimin khan Lunglei, Champhai, Siaha, Serchhip leh Lunglei District MJA-te chuan an press club-ah inkhawmpui an hmang a, kum 2026 - 2028 chhunga hruaitu tur an thlang nghal.

Lungleiah chuan inhlantharna hun hmang hmasain Lunglei MJA president H Lalthansanga'n a kaihruai a, chawhnu lamah hruaitu thar an thlang. President-ah H Lalthansanga, vice president-ah F Lalngaihzuala leh treasurer-ah K Lalrinpuia te thlan an ni.

Champhaiah chuan MJA president Lalhlupuia kaihhruaiin inkhawmpui hi hman a ni a, an pawl chhung inrelbawlna thilte an relho nghal. Champhai district leh Khawzawl district-in Information and Public Relations officer an inṭawm chu district IPRO tan thil buaithlak leh phurrit a nih avangin Champhai leh Khawzawl tan district IPRO a hran ve ve a dah turin Mizoram sorkarah dilna thlen nise, an ti.

Hruaitu atan president-ah Lalhlupuia, vice president-ah C Lalhnunpuia leh treasurer-ah C Lalrinsangate an thlang.

Siahaah chuan MJA inkhawmpui hi Siaha SDC Zorinsangi'n hmanpuiin, democracy ramah chuan sorkar khalhngil turin journalism chu a pawimawh takzet thu a sawi a, "Sorkar leh mipui thlunzawmtu an ni," a ti a, MJA member-te chu sorkar hmalakna hrang hranga thuthar thehdarh kawnga thawhho puiah a sawm nghal.

MADC AIPRO kaihhruaina hnuaiah hruaitu thar thlangin, president-ah CZ Hluna, vice president-ah Jeffrey Khara leh treasurer-ah V Pawhla te thlan an ni.

Serchhipah MJA inkhawmpui hi IPR dy director Andrew Lalremruata, Serchhip DRDO project director Malsawmtluanga Fanchhun, MJA gen secretary K Zothanpara leh MJA secretary H Lalchhandamate'n an hmanpui.

Chawhnu lamah MJA gen hqrs hruaitute kaihhruaina hnuaiah hruaitu thar thlan niin, president-ah Kapliana Pachuau, vice president-ah Lalremruata Ralte leh treasurer-ah Zonunsanga Kawlni thlan an ni.

Lawngtlai District MJA inkhawmpuiah chuan chawhma lamah rorelin, chawhnu lamah hruaitu thar an thlang. India leh Myanmar a bikin Rakhine state nen sumtawnna kalmek chu sorkarin awmze nei zawkin kalpui se, an duh thu resolution an pawm.

Lawngtlai MJA inkhawmpui hmanpuitu Lawngtlai bawrhsap Donny Lalruatsanga chuan journalist-te khawvel chu a zaua, ramri a nei loa, chi leh hnam a nei loa, tawp chin a nei lo tih sawiin, journalist-te chu theihtawp chhuah a ṭanla fat fat turin a chah.

Kum 2026-2028 chhunga hruaitu atan president-ah Elvis Lalthangzuala, vice president-ah H Lalrinmawia leh treasurer-ah Lalngheta Ralte an thlang.