Ṭha zawka hnathawh dan tur sawiho

PWD officer-te chuan nimin khan E-in-C conference hall-ah PWD minister Vanlalhlana hoin PWD hnuaia hna hrang hrangte ṭha zawka thawh dan tur an sawiho. PWD Minister pui tura ruat MLA pahnih H Ginzalala leh T Lalhlimpuiate pawh an tel.

Vanlalhlana chuan PWD hnathawhte hi mipuiin an hriat theih nan publicity-ah ṭan lak lehzual a ngaih thu a sawi a, "Sawrkar hnathawh hi rawngbawlna a ni a, mipuiten hamṭhatna an dawn theih nana dik taka hna kan thawh hi kan tih makmawh a ni," a ti.

Kalkhawmte chu an dinhmun a te emaw a lian emaw, an hna chu rawngbawlna-ah ngaia, hmun nuam emaw hmun hrehawmah pawh phur taka an mawhphurhna hlen chhuak zel tura fuihin PWD Minister chuan, kan kawng siamte hi a tlo theih zawk nan a enkawl dan mipui leh tlawmngai pawlte zirtir ṭhat a pawimawh thu a sawi.

H Ginzalala pawhin thu sawiin, "Sorkar hnathawkte hi file tikalmuangtu leh tiṭhuanawp theitu kan nih avangin tun aia ṭan lehzual a ṭul. Mipuite tana dawr nuam zawk kan nih a ngai. Hun hmandik hi hmasawnna atana thil pawimawh tak a nih avangin tun aia hun hmandik kawngah ṭan kan lak lehzual ṭul," a ti.

Thusawitu dang T Lalhlimpuia chuan, "Kumtin fur laia leimin avanga harsatna thleng ṭhin tihziaawm nan hmalak dan tur ngaihtuah lawk ṭhin a pawimawh," a ti a, engineer-te chu department hmel lanna an nih avangin, sik leh sa leh fur leh ṭhal atan tih tur hmasa leh hnunung hriat a, hna pawimawh zualte thliar thiama, inrelbawlna ṭha neih a ṭul thu a sawi.