LushAI Healthy Lunglei App tlangzarh

Lunglei bawrhsap Navneet Mann kaihhruaina hnuaia "Healthy Lunglei District Campaign" kal tlanga Lunglei district-in hriselna kawnga hma a sawn theihna tur leh hriselna kaihhnawiha mipui mamawhte awlsam zawka inpek theihna atana mobile application duan thar 'LushAI Healthy Lunglei App' chu Lunglei HPC vice chairman V Malsawmtluanga'n January 29, Ningani khan DC conference hall-ah a tlangzarh.

V Malsawmtluanga chuan Lunglei Bawrhsap leh a thawhpuite bakah, Health & Family Welfare department-a thawktute hmalakna leh LushAITech lamte nena an thawhhona zara LushAI Healthy Lunglei App tlangzarh theiha peih fel a ni chu lawmawm a tih thu a sawi, "Lunglei leh a chhehvela chengte'n awlsam zawka hriselna lam thil an ban thei tur hi a lawmawm. Khualzinte tan pawh kawng tam taka ṭangkai tur a ni. Hmarchhakah hetiang app hmasa ber tlangzarh a ni ta hi Lunglei mai ni lo, Mizoram pum tan pawh hmasawnna ropui tak a ni," a ti.

Lunglei Bawrhsap chuan app siam a nih chhan sawiin, "Inkaichhawn theih loh natna chi hrang hrang laka district mipuite, a bik takin ṭhalaite an lo him theih nan leh hriselna lam thil pawimawhte awlsam zawka mipui ban phaka chhawp chhuahna tur a ni. Lunglei chhung mai bakah Lunglei pawn lam mite tan pawh LushAI Healthy Lunglei App hi hman theih vek a ni dawn," ati a, mipui a tam thei ang berin he app hi chhawr ṭangkai se a duh thu a sawi.

App siamtu LushAITech team chuan App hman dan tur tlangpui an sawi fiah. LushAI Healthy Lunglei App hi mipuite'n awlsam zawka sorkar damdawi-in leh damdawi zawrhnate an dawr leh an biak pawh theihna tura ruahman a ni. He app hmang hian district chhunga sorkar damdawi-in leh health centre-a doctor-te ṭhut hun tur a en theih dawn bakah, OPD-a inentir turin appointment a lak lawk (book) theih dawn. App-a inziak lut damdawi dawr (pharmacy)-te aṭanga damdawi chah theihnate awmin, hriselna lama hriat tur pawimawh hrang hrangte pawh awlsam takin a hmuh theih dawn.