Mizoramah phár natna vei mi 1,563 hmu chhuak tawh

Mizoramah kum 1996 aṭangin phár (leprosy) natna vei hmuh chhuah a nih aṭanga nimin thleng khan Mizoramah phar natna vei mi 1,563 hmuh chhuah an ni tawh a; kum 2024-25 chhungin mi pasarih enkawl dam niin, enkawl mek mi 10 an awm.

Nimin khan Health Worker Training School, Kulikawnah World Anti-Leprosy Day 2026 hman a ni a; state leprosy officer Dr Lalawmpuia Chhangte-in kaihruaiin, Mizoramah kum 1996 aṭangin phar natna vei hmuh chhuah a nih thu a sawi a, "Phar natna vei hmuh chhuah a nih aṭanga tun thlengin Mizoramah phar mi 1,563 an awm tawh. Kum 2024-25 chhungin mi pasarih enkawl dam an ni a, tun dinhmunah Mizoramah phar natna vei mi 10 an awm mek," a ti.

State leprosy consultant Dr Nathan Vanlalhruaizela'n phar natna chungchanga thil pawimawh hrang hrang - phar natna vei enkawl dan leh damdawi ei dante a zirtir a; Health & Family Welfare department-in a thlawn veka a enkawl bakah, damdawi zawng zawng a thlawna pek an nih thu a sawi.