Lawngtlaiah HIV/AIDS zirho

Mizoram State AIDS Control Society (MSACS) leh World Vision India (WVI), Chhimtuipui Area Development Prog­ramme-te chuan nimin khan LIKBK Assembly House, Lawngtlaiah khawtlang hruaitute tan HIV/AIDS chungchang zirhona, 'Advocacy on HIV/AIDS' an buatsaih. Lawngtlai district-ah September 2016 aṭanga kumin (2019) September thlengin HIV hrik pai mi 128 hmuh chhuah an nih thu tarlan a ni.

Lawngtlai district AIDS nodal officer Dr S Thaizi chuan, Mizoram chu HIV/AIDS vei tam lamah a sang filawr hle tih sawiin, "HIV/AIDS laka kan ṭhalaite an fi­hlim theihna turin sorkar, kohhran leh khawtlang hruaitute kan ṭanho a, thawhhona ṭha tak kan neih a ngai," a ti a; HIV/AIDS veite chu thinhrik lo leh endawng lo a, khawtlangah rilru hahdam taka an awm theih nana tihtlángnêl thiam a pawimawh thu a sawi.

HIV activist Lal-chhuanzuali chuan, HIV/AIDS natna chu nawhchizuar leh inchiu ṭhinte chauhin an vei tura ngaih te, a veite entleu emaw buaipui ṭul lo nia ngaihnate chu sim a hun tawh thu a sawi a, "Mizoramah HIV/AIDS vei an pung nasa a, a kai tam berte hi mipat hmeichhiatna aṭanga kai an nih avangin, nu leh pate'n kan fate sex chung­changa an hriat tur ṭul leh pawimawh kan zirtir a, an nun kan venpui a ṭul," a ti.

Inkhawmah hian Lawngtlaia V/C member te, YLA, LWA leh MHIP hruaitute an tel a; HIV/AIDS Committee an din nghal bakah, thawktute'n kal khawmte thisen an endiksak nghal a ni.