Doctor, nurse leh health worker-te'n ṭawngkam zaidam an hman tam a ṭul - Dr Thangtea

Health Worker's Training Institute chuan nimin khan Kulikawn, Aizawla an auditorium-ah health worker zirlai lut tharte (batch 35-na) pualin 'Capping & Lamp Lighting Ceremony' an buatsaih a, Health minister Dr R Lalthangliana'n a hmanpui. Minister chuan, doctor, nurse leh health worker-te'n damlote lakah ṭawngkam mawi leh zaidam an hman tam a ṭul bik thu a sawi.

Health Minister chuan, Isua Krista khawvela a awm laia a thawh tam tak chu tihdam hna a nih thu sawiin, "Doctor, nurse leh health worker-te hian hmangaihna, lainatna, duhsaknain damlote an enkawl a ngai a, ṭawngkam mawi leh zaidam thlengin an hmang bik tur a ni. Vanram kawngkapui pana kan kal mek lai hian mi dang tana malsawmna nih hi a pawimawh ber," a ti.

Dr R Lalthangliana chuan, Mizorama damdawi-in - sub-centre, primary health centre, community health centre leh hospital hrang hrang leh quarters-te a tlawh chhuak deuh vek tawh tih sawiin, "Infras­tructure lam kan nei chhe hle a, hmalakna tur kan ngah hle. Kan quarters leh building hrang hrang mamawh sakna tur hi Mizoram budget aṭang ringawt chuan a harsa dawn a, CM nen pawh kan sawi dun tawh," a ti a; World Bank sum leh DoNER aṭangtein theihtawp an chhuah dawn thu a sawi. 

Kum tharah health worker post ruak 200 hnawhkhah an tum thu sawiin Health Minister chuan, "Post ruak hrim hrim hnawhkhah chungchangah Aizawl leh khawpui dang chan kan tum zel hi a fuh lo hle. Health-ah phei chuan khuain a mamawh ang azira ngaihtuahna sên kan tum a, health worker chuan thingtlang lam a kâwk bik a ni," a ti.

Dr R Lalthangliana chuan, thawktu 4th grade leh driver indaih lohna chinfel chu thil harsa lo tura an ngaih thu te, health worker-a kum 30 chuang thawk tawhte chu health supervisor-ah kaisantir an nih tawh thu te, Health Worker Training Institute-ah kum thar tìr têah computer thar 10 dah an tum thu te, sorkarin eng rua­hmanna ṭha pawh siam mah se, a tihlawhtling theitu chu thawktute an nih thute a sawi bawk.