Mizoramah kum 20 chhungin oil palm cheng nuai 540 man vel hralh tawh

Chief minister Lalduhoma chuan January 30, 2026 khan Bukvanneiah oil palm chingtute mamawh lamna tur Samadhan Centre One Stop Solution a hawng. Godrej Agrovet hian kum 20 chhungin Mizoramah oil palm cheng nuai 540 man vel an lei tawh tih tarlan a ni.

Tarlan danin, Godrej Agrovet-in kum 2005 aṭangin Mizoram sorkar hriatpuiin Koalsib leh Mamit district-a oil palm chingtute an thawhpui a, Mizorama an inbun aṭanga tun thlengin oil palm cheng nuai 540 man vel an lei tawh. Sorkar kum kal mek 2025-26 ah April-December 2025 chhungin oil palm rah ton 5,807 an lei tawh a, cheng nuai 95.7 an sêng tawh.

One Stop Solution-ah hian oil palm chingtute mamawh hrang hrang - leiṭha, pesticide, insecticide, tui pekna hmanrua, oil palm rah lawhna leh thil dangte tlâwm zawka lei theihna tur a ni.

Chief Minister chuan, oil palm chu Prime Minister-in a ngaih pawimawh thu leh DoNER Minister-in a sawi fo thu a sawi a, "Oil palm lamah hma kan sawn theih nan ngaihtuahna kan sêng nasa a, link road pawh kan laih belh zel dawn. July 13, 2024 khan Mumbai-ah Godrej Group president Pu Rakesh Swamy nen kan inkâwm a, Samadhan Centre din ve turin ka ngen a, ka ngenna ngai pawimawha Bukvannei leh Bawngvaa Samadhan Centre an rawn tihpuitling hi ka lawm hle," a ti.

Lalduhoma chuan, Godrej Agrovet-in kum 2014 khan Bukvanneiah oil palm hriak herna khawl an din thu te, darkar khatah oil palm rah quintal 50 a her theih thu te, an mamawh khawp her tur an hmuh zawh loh thu te, oil palm chingtuten hlâwk zawka an thar theih nan One Stop Solution chu a ṭangkai dawn thute a sawi bawk.

Chief Minister hi Agriculture & Farmers Welfare minister PC Vanlalruata, Assembly deputy speaker Lalfamkima, MLA Lalmuanpuia Punte leh sorkar hotu dangte'n an ṭawiawm a ni.