Minister-in Mizo hmarchatê a vailiam

Rural Development & Administration (RDA) minister Prof. Lalnilawma chuan January 30, 2026 khan Chhingchhipa MIFCO Complex aṭangin Mizoram State Rural Livelihoods Mission (MzSRLM) hnuaia Ropuiliani Women Farmer Producer Com-pany Ltd member (shareholder)-te thar Mizo hmarchatê metric ton 5 chu Karnataka state-a hralh turin a vailiam.

Prof. Lalnilawma chuan, Ropuiliani Women Farmer Producer Company-te hmalakna fakawm a tih thu sawiin, "Kan thlai tharte kan thawn chhuah dawn chuan kan uluk a ṭul a, chuti a nih loh chuan belhchian kan dâwl lo ang a, rei kan daih dawn lo. Tei rei peihna kan neih a, vawi khata hlâwk thut tumna rilru kan paih a ṭul," a ti a; thlai thar hralhna chungchangah harsatna neuh neuh awm ṭhinah sorkar, MzSRLM leh company aṭangin theihtawp an chhuahpui zel dawn thu a sawi.

Tarlan danin, sorkar kum 2025-26 kal mekah December 2025 leh January 2026 chhungin Ropuiliani Women Farmer Producer Company hian district pali, RD Block panga leh khaw 35 aṭangin Mizo hmarchatê metric ton 15.2 an lei tawh. Hmarcha an lei zinga metric ton 5 chu Sus Agri Development, Bengaluru hnenah an hralh a, metric ton 7.5 dang chu Relentless Foods, Odisha hnena hralh mai theih turin dahṭhat a ni.