Minister-in naupang league a hmanpui

Sports & Youth Services (SYS) minister Lalnghinglova Hmar chuan January 31, Inrinni khan Rajiv Gandhi Stadium, Mualpuiah Reliance Foundation leh Mizoram Football Association (MFA) buatsaih naupangte football inelna match 10,000 khelh tlin puala inkhawm a hmanpui. Naupang league hnuaiah naupang 3,500 chuang an awm mek.

Sports Minister chuan, India rama a vawi khat nan Reliance Foundation-in Mizoramah naupangte awmze neia football an zirna turin league mumal tak a kalpui thu a sawi a, "He inelna Naupang League tih hi football hmasawnna atana naupang chher chhuahna tur leh discipline kenkawhna atan duhthusam a ni," a ti a; a bul ṭantu zinga a tel ve thu sawiin, tuna league thlen chin chu an ngaihtuah phak piah lam a nih tawh thu a sawi.

MFA president ni bawk Lalnghinglova Hmar chuan, "Tun hmain Mizo naupangin an naupan laiin uniform jersey ha chungin referee hnuaia inkhelhna mumal an nei phak lo a, match 10 pawh khel tling mang loin India inelna an hmachhawn tawh ṭhin. Naupang league-a telte erawh chuan kum khatah competitive match 30 chuang in khel a, in nihlawh tak zet a, in hmabak a êng hl a nie," a ti.

Naupang League hi Aizawl, Lunglei, Champhai leh Kolasib district-ah kalpui niin, naupang kum 6-14 inkarte football hmanga inelna a ni a; kum 2022-ah khelh ṭan niin, a senso chu Reliance Foundation-in a tum a, MFA leh an hnuaia DFA ten an kalpui a ni.