Sairang lirtheite leh Aizawl taxi inhmu thiam lo

Mizoram Taxi Association (MTA) chuan thuchhuah siamin, Sairang rel chawlhhmuna khualzin châng ṭhin Aizawl taxi leh Sairang taxi/maxicab inkara inhmuh thiam lohna thlengah, buaina tipunlun zawnga hmalak ṭha lo an tih thu an tarlang.

MTA chuan, January 30, 2026 khan Sairang station-ah Commercial Vehicles Association, Sairang (CVAS) leh Aizawl taxi-te inkarah buaina a chhuak tih an tarlang. MTA-in inrem theih dan tur zawngin Aizawl DC leh Aizawl SP an dawr a, inremna tur duan ni mah se, CVAS lamin hming an ziah hnan ve theih leh si loh avangin inremna ziah a ni lo tih an tarlang a ni.

Mizoram Taxi Association chuan, kan member Sairang Railway Station-a passenger chang thin te, thlamuang tak a Passenger chan chhunzawm zel theih a nih thu leh, thil thleng hian ti tim lo turin hriattirna a ti chhuak a ni.

MTA chuan, boruak ṭha tak a awm tura an ngaih laiin, January 31, Inrinni khan passenger hmuak/châng tura Aizawl aṭanga Sairang station-a kalte chu dan an nih thu an sawi a, "Remna zawn vat a ngai a ni tih hriain, buaina chinfel dan tur ngaihtuahin MTA hruaitute leh CVAS hruaitute chu Vaivakawn Police Station-a thuneitute kaihhruainain inbiakna a ni. MTA leh CVAS joint meeting neih thuai ni se, chumi hma chu a tu zawk zawk mahin harsatna insiam tawn loin, Sairang station-ah hian passenger chàn ni se tiin thu dah rih a ni," an ti.

Buaina tireh tur zawnga theihtawpa hma an lak laiin, January 31-a Sairang lam video darhah, buaina chawk chhuaktu ber ni âwma ngaih theih tur leh, a khua ang zawnga tibuaia MTA puh an ni chu pawi an tih thu an tarlang bawk.