Official-te'n Thenzawl an enfiah

Urban Development and Poverty Alleviation (UDPA) department leh Animal Husbandry and Veterinary (AH&Vety) department hotute chuan January 30, 2026 khan Thenzawl an tlawh a; Neihloh khaw hmun sawnna tur te, Thenzawl Peace City greenfield hmun tur leh, AH&Vety department hmun thar turte an en.

Thenzawl leh a chhehvel hmun hrang hrang enhonaah hian UDPA secretary Lalmalsawma Pachuau, AH&Vety secretary C Lalsangliana, Serchhip DC Paul L Khuma, UDPA Director, AH&Vety Director, Serchhip Additional DC, Thenzawl SDO Civil, Tourism department aiawhte leh mi pawimawh dangte an tel a ni.

Peace City greenfield atan cheng vbc 500 vel ruahman a nih thu te, UDPA department-in SASCI 2026 chhunga Peace City project thun tur chinte ngaihvenin, SASCI bik aṭang hian Peace City project atan cheng vbc 150 vel hmuh theih an inbeisei thute tarlan a ni.

Greenfield atana hmunhma an hman turah tuna AH&Vety Dilpui hmun leh Thenzawl Golf Course ram huam chin ṭhenkhat a tel a; AH&Vety Dilpui ram hi ran chaw (fodder) chìnna leh siamna hmun atana hman mek niin, Peace City hmunhma atana hman tum a nih avangin ran chaw chìnna hmun dang ngaihtuah a ngai a ni.