State leh UT din champha lawm

Governor Gen. Dr Vijay Kumar Singh hoin January 30, 2026 khan Lok Bhavan-ah 'Ek Bharat Shreshtha Bharat' hmalakna hnuaiah state pali - Manipur, Meghalaya, Tripura leh Uttar Pradesh leh, Dadra & Nagar Haveli and Daman & Diu union territory te foundation day lawm a ni.

Larsap chuan, Ek Bharat Shreshtha Bharat chuan India ram hnam ziarâng hausa tak chawi lâr a tum thu a sawi a, "Kan kalna apiangah hnam ziarâng leh nunphungte mi dang hmuh theiha kan pho chhuah a, keini pawhin an hnam ziarâng leh nunphungte kan zir hian inhriatpawh tawnna leh inunauna a siam a ni. Inpumkhat turin mi dangte hnam ziarâng leh nunphung kan zaha kan hlut thiam a pawimawh," a ti.

Foundation day lawmnaah hian Manipur Governor Ajay Kumar Bhalla, Meghalaya Governor CH Vijayashankar, Tripura Governor Indra Sena Reddy Nallu leh Uttar Pradesh Governor Anandiben Patel te thuchah ngaihthlak a ni a; Manipur, Meghalaya, Tripura, Uttar Pradesh leh DNHDD chanchin tarlanna video thlirho a ni. RIPANS leh Johnson College zirlaite'n hnam lâm an entir bawk.

Sorkar thuchhuah tarlan danin, Uttar Pradesh chu January 24, 1950 khan state-ah puan a ni a; Manipur, Meghalaya leh Tripura te chu January 21, 1972 khan North Eastern Region (Re-organisation) Act, 1971 hmangin state puitlingah hlankai a ni. UT pahnih - Dadra & Nagar Haveli leh Daman & Diu chu January 26, 2020 khan UT pakhatah chhûn fin an ni.