KHAWTHLIR

Thisen pe

January 31, Inrinni khan Aizawl Theological College zirlaite'n Synod Hospital tan thisen unit 47 an pe a, petute mipa 44 leh hmeichhia pathum an ni. Inrinni vek khan KṬP, Melthum Bialte'n ZMCH tan unit 31 pein, petute mipa 21 leh hmeichhia 10 an ni a; KṬP, Lunglei Farm Veng Branch-in Lunglei Civil Hospital tan an kohhran sunday school hall-ah unit 18 an pe bawk a, petute mipa 15 leh hmeichhia pathum an ni.

MJA inkhawmpui

Mizoram Journalists' Association (MJA), Mamit district chuan January 31, Inrinni khan Mamit MJA Press Club-ah Annual Conference vawi 18-na an hmang a, president Lalhuma'n thuchah a sawi. Kum 2026-2028 chhunga an hruaitu tur an thlang a; president atan Lalhuma, vice president atan P Lalchunglura leh treasurer atan H Lalram­liana te an thlang a ni.

Sanitary complex

Dulte Community Sanitary Complex chu January 30, 2026 khan Dulte VC president R Lianziaka'n a hawng. Complex hi PHE department leh Rural Development department thawhhona (convergence) hnuaia Rs 6,00,000 sênga sak a ni a; PHE department-in Swachh Bharat Mission (Grameen) leh Rural Development department-in MGNREGA Material Component aṭangin Rs 3,00,000 ve ve an thawh a ni.

Kawng khâr dawn

Traffic SP C Vanlalvena chuan thuchhuah siamin, PHE department-in Laipuitlang-Chanmari khàm thlaah tui pipe zawm hna an thawh dawn avangin naktuk aṭanga hna thawh zawh hma chu ni tin zing dar 6 aṭanga zan dar 6 inkarah Chanmari-Chaltlang kawng zatve khâr ṭhin a nih dawn thu leh, tui pipe khai chhoh chhung leh insiamrem chhung bikah kawngpui hi khâr a nih dawn thu a tarlang.

Tla hlum

Roneihtluanga (24) s/o F Laldintluanga, Lunglawn chu nimin chhun dar 1 vel khan Dawn leh Leite inkara Mat lei aṭangin a tla a, a ká chhawn loin a thi. Roneihtluanga hi vawiinah vui a ni ang.