Mizorama ruhrote zirchiang dawn

Archeological Survey of India (ASI), Aizawl Circle hmalaknaa Mizoram hmun ṭhenkhata mihring ruhro lakkhawmte bel chiang tur leh an DNA sample te laa, zirchiang zui tura lokal mithiam pathum - Birbal Sahni Institute of Palaeosciences, Lucknow a mi Dr. Niraj Rai leh University of Chicago-a Dr Maanasa Raggavan leh Pablo Bartholomew-te chuan Inrinni zing khan Aijal Club-ah INTACH, Mizoram Chapter hruaitute, Art & Culture Department aiawhte, Mizo Archeological Society hruaitute leh Mizoram University-a thawkte an kawm.

Meeting-ah hian DNA sample lak leh zirchianna hi uluk taka kalpui an duh thu te, rinthu leh rindan awmsa hmanga ngaihdan siam ringawt lo tura an duh thu te, uluk taka tih anih loh chuan Mizo hnam tan a pawi theih dante leh Mizo hnam chanchin pawh thui tak a nghawng theih thute sawichhuah a ni. Mithiamte'n an thil hmuhchhuahte chu tlangzarh anih hmaa en ho leh phawt ṭha an ti tlang a, an hna an zawh hnuah an enho leh dawn a ni.