Assembly session tan a ni MLA hlui pahnih sûnna hun hmang

Ni thum chhung awh tur Mizoram Legislative Assembly thlasik ṭhutkhawm (winter session) chu nimin khan ṭan a ni a, session hnuhnung ber leh tun ṭum session inkara MLA lo ni tawh thi mi pahnih sûnna hun hman a ni.

Deputy speaker R Lalrinawma'n a sawm angin House leader, chief minister Lal Than-hawla'n MLA lo ni tawh thi pahnih, minister hlui J Lalthangliana leh deputy speaker hlui LP Thangzika te chanchin leh uina thu a sawi a; a mi hriat chian, mi fel tak leh House-ah pawh hnuhma nei ṭha tak an nih thu a tarlang.

Chief Minister sawi danin, LP Thangzika hian kum 1947-ah Mizo Union zawmin politics a khel ṭan a, kum 1972-ah Mizo Union ticket-in Hnahthial bial
aṭangin MLA atana thlan tlin a ni. Hnathial bialah vek kum 1993-ah MNF ticket-in MLA atan thlan tlin leh a ni a; kum 1998 khan deputy speaker atan thlan a ni.

J Lalthangliana hian kum 1977-ah politics a zawm a, kum 1985 khan MNF leh MPC
ṭangkawp candidate niin Phul-dungsei bial aṭangin MLA atan thlan tlin a ni. MNF leh MPC sorkar inṭâwm siamah minister of state a ni a, mahse, party pahnih-te thawhhona a tawp hnuah opposition lamah a awm zui.

J Lalthangliana hi politics khawvel bakah chanchinbu khawvelah a inhmang a, kum 1979 khan Mizo Arsi chanchinbu tichhuak a, kum 1985 khan Sakeibaknei magazine a tichhuak leh. MJA president atan a zawnin term nga president a ni a, Mizoram sorkar chuan 'Prominent Press Representative' atana a puan mi panga zingah a tel a ni.

Oppostion group aiawha thu sawitu, an leader Vanlalzawma chuan, opposition lam pawhin LP Thangzika leh J Lalthangliana te an ui tak zet thu a sawi.

House Leader leh Opposition group Leader-te'n thu an sawi zawhah member-te chu MLA hluite sûn nan ngawi rengin minute khat chhung an ding a ni.

Session-ah hian chief minister Lal Thanhawla chuan Thawh-
ṭanni zana thi Tamil Nadu chief minister J Jayalalithaa chanchin a sawi bawk a; a ruang chu nimin tlai lama vui chauh tur a nih avangin tun ṭum session-ah chuan sûn a rem hrih loh thu House a hrilh.

Nimin Assembly session-ah hian Committee on Local Fund chairman John Siamkunga leh Subject Committee-III chairman R Vanlalvena ten paper an pharh a; Fisheries minister Dr BD Chakma put luh 'The Mizoram Fisheries (Amendment) Bill, 2016' chu pass a ni.

Session hi vawiinah chhun-zawm a ni dawn a, zawhna leh chhanna hun hman a nih zawhah sorkar thil pawimawhte sawiho a ni ang.