CM-in zawh belhna a chhang duh lo

PWD changtu chief minister Lal Thanhawla chuan nimina Assembly session-ah MNF member Lalruatkima zawh belhna a chhang duh lo a, "Ka chháng dawn lo," a ti.

Lalruatkima'n Sih-hmui to Lengpui kawnga Tlawng lei chim chung-changa a zawhna kal zela a zawh belhna, Ministry-in sanction a siam dan, metric ton 24 phur chin zawh theih tur ni lo metric tone 20 phur chin zawh theih tura dawh a nih chhan te, triple structure tur double structure-a dawh a nih chhante leh thil dang a zawh belh a ni.

Chief Minister chuan zawhna lut ang chu a chháng chiang tâwk tawha a hriat thu sawiin, zawh belhna hi a chhang duh lo. Lalruatkima'n chhang tura a ngen nawn hnuah pawh CM Hawla chuan a chhang duh lo a ni.

Lalruatkima zawhna Chief Minister-in a chhan danin, Sihhmui to Lengpui inkara Tlawng lei chim dawh ṭhatna atan Ministry of Road Transposrt & Highways aṭangin April 30, 2015-ah cheng nuai 297.60 hmuh a ni a; lei dawh
ṭhatna atan hian cheng nuai 244.20 hman niin, June 24, 2016-ah dawh zawh a ni.

Lei dawh ṭhat bula RCC hmanga lei dawh tur chhunzawm a nih hun tur zawhna chhangin Lal Thanhawla chuan, "Chhunzawm leh hun tur hriat a ni rih lo," a ti.