KHAWTHLIR

Sorkarin sûn

Thawhṭanni zana thi, Tamil Nadu chief minister J Jayalalitha sûnna atan nimin khan Mizoram sorkar building-ah hnam puanzar a ngul chenveah zâr a ni. J Jayalalitha hi Thawhṭanni zan dar 11:30 khan lung lam ṭhat lohna vangin Apollo Hospital, Chennai-ah a thi a ni.

Synod Inkhawmpui

Mizoram Presbyterian Kohhrana rorelna sang ber, Synod Inkhawmpui chu vawiin hian Durtlang Kohhran biak-inah ṭan a ni dawn a, Pathianni zanah a ṭiak ang. Kumin Synod Inkhawmpuia moderator tur chu Rev. Lalzuithanga a ni.

Award dawng

Lalrosangi, Zarkawt Babutlang chuan December 5, 2016 khan India rama Bharat Scout and Guides chawimawina sang, Silver Elephant Award a dawng. Award hi Rashtrapati Bhavan-ah President Pranab Mukherjee-a'n a hlân a ni.

Rui chunga khalh phal lo

Republic Veng Joint Action Committee chuan thuchhuah siamin, an veng chhungah dan pêl leh rûi chunga lirthei khalh phal a nih loh thu leh zanah two wheeler intlansiak leh ri ring bengchheng lutukte tlan phal a ni lo tih an tarlang a, "Section YMA-te nen hmun hrang hrangah ngawrh taka duty a ni a, phal loh tih ching man an nih chuan an chungah na taka action lak nghal a ni ang," an ti.

City bus zat

Transport minister John Rotluangliana'n MNF member Lalrinawma zawhna a chhan danin, tun dinhmunah Aizawl city bus plying permit nung mek 266 a awm a, chu'ng zinga 151 chu kum 10 aia rei tlân (service) tawh an ni.

Hawn thuai tum

PWD changtu chief minister Lal Thanhawla chuan, Chhimtuipui Darzo kâia lei dawh mek chu a rang thei ang bera hawn theiha peih tum a nih thu, MNF member Dr K Beichhua zawhna chhangin House a hrilh.